„Fyrir páskana var ég búin að ákveða að þetta árið ætlaði ég að splæsa á mig Konfekteggi frá Nóa og Síríus. Gleðin jókst, þegar ég fékk með í kaupunum pakka af Rúbín Súkkulaði. Pakkinn var grunsamlega léttur, en þegar maður er á hlaupum, kemur fyrir að slík smáatriði vekja ekki athygli.“
Þetta skrifar kona, sem vill ekki láta nafn síns getið, inn í Facebook-hóp þar sem skipst er á ráðum til að endurvinna, hugsa betur um umhverfið. Með þessum pistli lætur hún fylgja nokkrar myndir af þeim miklu umbúðum sem fylgja nokkrum súkkulaðimolum frá Nóa Siríus.
„Aftan á pakkningunni tala framleiðendur um sjálfbærni og samfélagsábyrgð. Hér eru svo myndir af þessarri frábæru „gjöf“ af pappa utan um 6 súkkulaði,“ skrifar konan, sem gaf DV leyfi til að birta myndirnar.
Við þessa færslu hafa margir skrifað athugasemdir og eru þær á eina leið – uppfullar af hneykslun.
„Algjörlega steikt,“ skrifar einn meðlimur. „Þeir ættu að skammast sín!“ skrifar annar. „Það eru aldeilis umbúðir utan um ekki neitt,“ skrifar þriðji og sá fjórði einfaldlega: „Þetta er sorglegt.“
Hvað finnst lesendum DV – Er þetta boðlegt nú á tímum þar sem mikið er talað um loftslagsbreytingar og hvernig má sporna við þeim?