Auglýsing úr herbúðum einkaþjálfarans Egils „Gillz“ Einarssonar fór í óvænta dreifingu í gær. Í auglýsingunni sést fáklæddur Gillz í sólarlöndum og yfirskriftin er:

„ÁMINNING! Styttist í sundlaugarbakkann.“

Kona að nafni Anna Ragnarsdóttir sér sig knúna til að skrifa athugasemd við auglýsinguna á Facebook, á gamansömum nótum þó.

„Fer sundlaugarbakkinn ef maður er enn með fellingar og mjúkan malla?“ skrifar Anna. Þá svarar Gillz:

„Búinn að rannsaka það. Ég var á sundlaugarbakkanum á Benidorm 2012 með fellingar og mjúkan kvið. Sundlaugarbakkinn fór ekki fet. (Staðfest).“

Skjáskotum af auglýsingunni og samskiptum Önnu og Gillz var deilt inni í Facebook-hópnum Jákvæð líkamsímynd í gær. Manneskjan sem deildi þótti athugasemdir Önnu mjög góðar. Þeir sem skrifa athugasemdir við innleggið eru einnig á því að Gillz hafi tæklað þetta nokkuð vel.

„Mér finnst svar Gillz bara nokkuð flott. Eða er ég að miskilja?“ skrifar einn meðlimur. „Alveg ágætt svar en ótrúlega asnaleg auglýsing til að byrja með,“ skrifar annar. Enn annar meðlimur tekur í sama streng og finnst auglýsingin ekki upp á marga fiska. „Mér finnst hann nú svara jafn vel og sýna sjálfur það skipti ekki nokkru máli þrátt fyrir þessa auglýsingu.“

„Gillz flottur í svörum,“ skrifar svo enn annar meðlimur, þar til Anna sjálf mætir í þráðinn með þetta innlegg:

„Mér fannst þetta gott svar hjá kauða! Bjóst við því að hann myndi nú ekki svara eða þá bjóða mér farþjálfun. Og hlakka til að hlamma mér á sundlaugarbakkan með minn mömmumaga og fellingar.“