„Vegna slæmrar umfjöllunar sem Breiðholtið hefur fengið í fjölmiðlum um langt skeið langaði mig til þess að gera eitthvað skemmtilegt og jákvætt fyrir nágranna mína,“ segir Breiðholtsbúinn Jóhann Sveinsson. Hann tók sig til fyrir stuttu, setti upp bás í Hólahverfinu í Breiðholti og bauð vegfarendum upp á hressingu.
„Mér datt í hug að það gæti verið upplífgandi fyrir fólk að geta stoppað við og fengið sér kaffibolla og sneið af rúllutertu. Þó veitingarnar séu ekki merkilegar munu þær vonandi auka hverfisvitund,“ segir Jóhann.
Jóhann hefur lengst af búið í Breiðholti og hefur undanfarna sex mánuði skipulagt foreldrarölt um hverfið, þó hann sé sjálfur ekki foreldri. Honum er því afar annt um hverfið og hefur uppátæki hans með hressingarbásinn vakið athygli inni í Facebook-hópi íbúa hverfisins.
https://www.instagram.com/p/BuoMBQog2cR/
„Það er þessum manni að þakka að það er gott að búa í Breiðholti,“ skrifar einn Breiðholtsbúi í Facebook-hópnum Íbúasamtökin Betra Breiðholt og uppsker færslan mörg læk. Jóhann segir að íbúar hverfisins hafi vissulega verið ánægðir með uppátækið.
„Viðbrögðin voru góð þótt fólk hafi virðst vera hissa,“ segir Jóhann. En ætlar hann að gera þetta aftur?
„Já, ég sé fram á að þetta verði reglulegur viðburður.“
