Út er komin sjöunda ljóðabók Guðrúnar Hannesdóttur, Þessa heims, og hefur að geyma fimmtíu og sjö ljóð.
Guðrún hefur á síðustu árum skipað sér í raðir góðskálda og hlotið viðurkenningar fyrir ljóð sín. Hún hlaut Ljóðstaf Jóns út Vör 2007 og ljóðabók hennar Humátt var tilnefnd til Fjöruverðlauna 2016 með eftirfarandi umsögn: Humátt er eftirminnileg, innihaldsrík og vönduð ljóðabók sem einkennist af skörpu innsæi, aðdáunarverðum stílbrögðum og óbilandi tilfinningu fyrir möguleikum ljóðsins.
Þessa heims er 67 blaðsíður. Kápu skrýðir ranghverfa altarisklæðis úr Laufáskirkju frá 1694.
Ljóð Guðrúnar einkennast meðal annars af náttúrstemningu, til dæmis ljóðið „Lauf“ sem við birtum hér:
fátt er hljóðara
hrímföllnu laufi
á heiði
ekkert
ódauðlegra
silfruðum orðum
sem sólin lýsir upp
örskotsstund
einn vetrarmorgun
Nýtt ljóðasafn Guðrúnar fæst í öllum betri bókaverslunum og í vefverslunum þeirra.
