Bandaríski leikarinn Ving Rhames hefur rifjað upp óhugnanlegt atvik sem hann lenti í fyrir tveimur árum. Þá miðuðu lögreglumenn byssu á Rhames vegna gruns um að hann væri innbrotsþjófur.

Þannig er mál með vexti að Rhames var að koma heim til sín í Santa Monica í Kaliforníu umræddan dag. Kona í nágrenninu hafði talið sig hafa séð „stóran blökkumann“ vera að brjótast inn í húsið og hringdi í lögreglu í kjölfarið.

Þegar lögreglan knúði dyra mætti honum óskemmtileg sjón. Þrír lögregluþjónar og lögregluhundur voru fyrir utan húsið og miðaði einn lögregluþjónninn byssu á leikarann. Segir Rhames að hann hafi orðið var við rauðan blett á enninu á sér þegar hann opnaði dyrnar.

Rhames sagði frá þessu í the Clay Cane Show á föstudag. Hann sagðist hafa útskýrt fyrir lögreglu að hann ætti heima í umræddu húsi og lögreglan hafi staðfest þann framburð skömmu síðar. En atvikið skildi eftir sig ör hjá Rhames sem veltir fyrir sér hvað hefði gerst ef sonur hans hefði verið heima og komið til dyra.

„Hvað ef þetta hefði verið sonur minn, með tölvuleikjafjarstýringu eða eitthvað álíka í höndunum? Lögreglan myndi eflaust telja að um byssu væri að ræða. Þú veist, Trayvon var með Skittles-poka í höndunum,“ sagði Rhames og vísaði í dauða Trayvon Martins, 17 ára pilts sem var skotinn til bana af lögreglu árið 2012.