Ísak Ernir Kristinsson hefur verið ráðinn framkvæmdastjóri Tæki.is sem sérhæfir sig í tækjaleigu til fyrirtækja og einstaklinga. Fyrirtækið býður mikinn fjölda af vinnuvélum til útleigu, svo sem vinnulyftur, jarðvinnuvélar, lyftara og smágröfur.
„Ég er þakklátur fyrir traustið og hlakka til að nýta reynslu mína í fjármálum, rekstri og umbótum til að styrkja fyrirtækið enn frekar á næstu misserum. Með því að leggja áherslu á framúrskarandi þjónustu við bæði núverandi og nýja viðskiptavini, munum við efla vöxt Tæki.is og tryggja áframhaldandi velgengni,“ segir Ísak Ernir.
Í tilkynningu kemur fram að Ísak Ernir starfaði áður hjá ræstingar- og fasteignaumsjónarfyrirtækinu Dögum frá árinu 2021, síðast sem fjármálastjóri. Þar áður vann hann hjá Securitas sem stjórnandi mannaðrar þjónustu á Keflavíkurflugvelli. Ísak sat í stjórn Þróunarfélags Keflavíkurflugvallar, KADECO, á árunum 2018-2024. Ísak er með B.Sc. gráðu í viðskiptafræði frá Háskóla Íslands, með sérstaka áherslu á reikningsskil.
Terra Einingar, dótturfélag Terra umhverfisþjónustu, festi nýlega kaup á Tæki.is. Tæki.is velti 586 milljónum króna árið 2024, sem samsvarar 2,9% vexti frá fyrra ári. Hagnaður félagsins nam 26 milljónum í fyrra. Eignir í árslok 2024 námu 830 milljónum króna og eigið fé var um 268 milljónir króna. Terra Einingar keypti Öryggisgirðingar í júlí í fyrra og eru þetta því önnur stóru kaup fyrirtækisins á 12 mánuðum.
„Við erum afar ánægð með að fá Ísak til liðs við okkur til að stýra Tæki.is inn í metnaðarfulla vegferð til framtíðar. Kaup Terra Eininga á félaginu styrkir enn frekar fyrirtækið og eykur breidd og styrk í vöruframboði félaganna,“ segir Fannar Örn Þorbjörnsson, framkvæmdastjóri Terra Eininga.
