Halla Hrund Logadóttir, þingmaður Framsóknarflokksins, minntist vinkonu sinnar, sem myrt var í Bandaríkjunum um helgina, í þingræðu sinni i dag. Segir hún heiminn fátækari eftir fráfall vinkonu sinnar og gildi hennar og sýn eiga mikið erindi í umræðunni og hvernig við finnum lausnir.

„Heimurinn varð fátækari um helgina þegar að Melissa Hortman vinkona og fyrrum bekkjasystir og maðurinn hennar voru myrt í Bandaríkjunum. Melissa varð ein af 70 einstaklingum á lista morðingjans yfir stjórnmálamenn sem hann var málefnalega ósammála.“

Halla Hrund lýsir vinkonu sinni og segir Melissu hafa verið glaðlynd, algjörlega hrokalaus, eldklár og haft ástríðu fyrir samfélagi sínu. Melissa hafi verið ein þeirra sem veittu Höllu Hrund innblástur í stjórnmálum.

„Henni tókst einhvern veginn að sameina hlýju og festu, hugrekki og langtímasýn. Við deildum áhuga á orkumálum og jafnrétti, en Melissa var einn af höfundum sólarorkulöggjafar Minnesota og hafði stutt við foreldraorlof og frelsi kvenna í löggjöf. Hún studdi við stofnun Stelpur styðja stelpur, enda lyfti hún fólki upp í kringum sig.“

Halla Hrund segir Melissu hafa verið þekkta fyrir að ná árangri í gegnum samstöðu. „Hún gat byggt brýr milli sjónarmiða til þess að ná sátt og árangri fyrir heildina ekki bara fyrir sína kjósendur. Síðasta dæmið var degi áður en hún var myrt, en þá kaus hún ein demókrata með Republikönum um samkomulag um fjárlög til þess að hugsa um heildina koma í veg fyrir fylkið færi ekki í þrot. Þannig stjórnmálamaður var Melissa. Blessuð sé minning Melissu Hortman. Hugur minn er hjá fjölskyldu hennar.“

Halla Hrund segir að fyrir henni sé pólaresérínginn sem með þessum hræðilegu atburðum birtist í Bandaríkjunum líka meira í orðræðunni á landi dæmi um „hversu mikilvægt það er að við stjórnmálamenn reynum að teygja okkur yfir ganginn. Hlustum á mótmæli ólíkra hópa, hér innan þings og utan. Tökum orðræðunni alvarlega án þess að tala niður sjónarmið eða upplifun fólks. Sýnum að við getum verið málefnalega ósammála en samt sest niður og leyst úr ágreiningi.

Þegar að Melissa tók við sem leiðtogi demókrata í þingi Minnesota sagði hún: „Við erum ekki hér til að forðast ágreining. Við erum hér einmitt til að eiga í ágreiningi…. En ef við getum tekist á en haldið í góðan anda og auðmýkt, þá mun okkur ganga betur og fylkinu ganga betur.

Höfum slík orð hugföst nú þegar að við reynum að ná lendingu á þessu þingi. Á meðan samvinna og málamiðlanir skilar kannski minni skrefum í árangri fyrir markmið einstakra flokka þá skilar slíkt oft samhentara þjóðfélagi.

Það er mikið virði í því.“