Hvar sem ber niður er vandræðaástand vegna uppsafnaðrar innviðaskuldar og getuleysis síðustu ríkisstjórnar til að takast á við hlutina. Ný ríkisstjórn hefur þegar sett mikilvæg mál á borð við uppbyggingu hjúkrunarheimila í réttan farveg og tekið til sín málefni barna með fjölþættan vanda, sem hafa valdið sveitarfélögum miklum búsifjum. Logi Einarsson er gestur Ólafs Arnarsonar í hlaðvarpi Eyjunnar.
Eyjan - Logi Einarsson - 4
„Munurinn á stjórnarliðinu núna og í síðustu tveimur ríkisstjórnum er að við erum samstiga, við tökum mál inn í ríkisstjórn og við afgreiðum þau og eftir að þau koma þaðan út þá eru allir sammála um þau. Við bjuggum hins vegar við það í sjö eða átta ár að mál ýmist komust ekki út úr ríkisstjórn og jafnvel þótt þau kæmust út úr ríkisstjórn þá komu þau ekki út úr einum af þessum þremur þingflokkum og fyrir vikið gerðist ekki neitt,“ segir Logi.
Hann segir ríkisstjórnina hafa lagt fram býsna stór og mikilvæg mál á fyrstu hundrað dögunum. Slæm reynsla af síðustu ríkisstjórn hafi hvatt nýju stjórnina til dáða. „Við höfum líka náð sátt um það í ríkisstjórninni og þingflokkunum að vera ábyrg, sýna aðhald í efnahagsmálum, reyna að laga ríkisfjármálin, ná niður vöxtum og verðbólgu, vinna í takti við Seðlabankann og ég held að það sé besta kjarabótin sem heimili og fyrirtæki í landinu fá. Síðan þegar svigrúm skapast þá getum við farið í uppbyggingu af meiri krafti.“
Logi segir ríkisstjórnina líka hafa lagt áherslu á að mikilvægt sé strax á fyrstu skrefum að útfæra og innheimta sanngjörn auðlindagjöld til þess að geta greitt niður og undið ofan af þeirri innviðaskuld sem búið sé að safna upp hér á landi.
Hún er alveg hrikaleg, við þurfum bara að horfa á vegina.
„Það þarf ekkert annað en að horfa á þá en það er í rauninni sama hvar ber niður, það er alls staðar vandræðaástand. Við erum að ráðast líka í mjög mikilvæg verkefni sem síðustu ríkisstjórn og síðustu ríkisstjórnum tókst ekki. Við erum núna að ná samkomulagi við sveitarfélögin um það að það verðum við sem berum ábyrgð á uppbyggingu hjúkrunarheimila og séum ekki í þessari eilífu deilu um 15-85 prósentin. Við ætlum að taka til okkar málefni barna með fjölþættan vanda þannig að lítið þorp lendi bara ekki í stórkostlegum vandræðum ef þar býr ólánsamur unglingur eða barn. Þetta skiptir gríðarlegu máli. Við höfum bolmagn til þess og við eigum að gera þetta.
Einnig er hægt að hlusta á Spotify.
