Markaðssetning og sjálfbærni er það fyrsta sem skorið er niður þegar þrengir að í hagkerfinu. Þetta er mjög miður vegna þess að viðspyrnan verður miklu auðveldari ef fyrirtæki gæta þess að halda vörumerkinu á lofti líka í efnahagsþrengingum. Síðasta ár var erfitt hjá auglýsingastofum. Það var ekki eitt heldur allt – efnahagsólga, háir vextir, kjaradeilur og svo kosningar og allt auglýsingaplássið uppselt. Anna Kristín Kristjánsdóttir, formaður Samtaka íslenskra auglýsingastofa (SÍA), er gestur Ólafs Arnarsonar í hlaðvarpi Eyjunnar.

Hægt er að hlusta á brot úr þættinum hér:

Anna Kristin Kristjansdottir - 5

„Síðasta ár var bara mjög skrítið og erfitt fyrir margar auglýsingastofur. Það var bara svo margt í gangi og þetta er náttúrlega líka Ísland í hnotskurn. Það voru ekki bara náttúruhamfarir heldur líka efnahagsólga og vaxtastig og síðan bætast einhvern veginn kjarasamningar ofan á og það er einhvern veginn alltaf allt í gangi í einu.“

Svo komu kosningar.

„Já, og svo komu kosningar ofan í það og þá var allt auglýsingaplássið uppselt. Við getum haldið endalaust áfram. En síðasta ár var erfitt. Það er einmitt málið að auglýsingabransinn er háður því sem er að gerast í samfélaginu og við í raun og veru verðum að stökkva af stað. Tökum sem dæmi að þegar Covid var vorum við með Almannavarnir sem þurftu mikið á aðstoð að halda við að koma skilaboðum áleiðis. Auglýsingabransinn er að starfa fyrir fullt af apparötum sem þurfa bara að koma upplýsingum á framfæri.“

Anna Kristín segir aðila af þessu tagi lenda í því að þurfa allt í einu að koma upplýsingum á framfæri og það geti verið snúið fyrir þá sem eru ekki í þessu á hverjum degi. Þá koma auglýsingastofurnar inni málið. „Það þarf að finna hvaða miðil á að nota og hvernig komum við skilaboðunum til skila. Miðillinn getur verið SMS – en sumir nota bara ekki SMS lengur af því þeir nota bara eitthvað annað. Það er að svo mörgu að huga, en efnahagslega fyrir okkur, klárlega þegar fyrirtæki taka í handbremsuna og skera niður kostnað þá er markaðskostnaðurinn því miður eitt það fyrsta sem skorið er. Núna bættist sjálfbærnin við, held ég, ég held að það hafi verið köttað, þetta tvennt.“

Hún segir það mjög miður að fyrst skuli skorið niður á þessum sviðum þegar þrengir að hjá fyrirtækjum. „Úthald er svo mikilvægt og ekki síður í markaðsmálum að halda sýnileikanum á lofti af því að viðspyrnan verður miklu betri eftir erfiðleika ef þú ert búinn að halda vörumerkinu þínu á lofti.“

Hægt er að hlusta á hlaðvarpið í heild sinni hér: