Jón Gnarr þingmaður Viðreisnar hefur ekkert lagt grínið á hilluna eftir að hann settist á þing. Í færslu á Facebook segir hann frá óborganlegu bernskubreki sínu þegar hann rakaði á sig móhíkanarönd og var rekinn úr vinnunni fyrir.

„Ég hef stundum sagt söguna af því þegar 13 ára ég rakaði á mig móhíkanarönd með hjálp Ólafs Elíassonar vinar míns. Ég var þá að vinna í kjötborðinu í Kron í Glæsibæ. Guðmundur verslunarstjóri var miður sín og sagðist tilneyddur að láta mig fara.“

Jón segist hafa gengið snöktandi heim og fyrir einhverja tilviljun hafi faðir hans verið heima. Hann spurði soninn eðlilega af hverju hann væri ekki í vinnunni og Jón sagðist hafa verið rekinn.

„Rekinn ? Fyrir hvað ?

Klippingin svaraði ég og benti á kambinn

Pabbi horfði rannsakandi á klippinguna

Og hvað er að þessari klippingu, spurði hann.“

Jón yppti öxlum og þegar faðir hans spurði hvað hann ætlaði að gera yppti hann þeim aftur.

„Þarna gerði pabbi eitthvað það allra skrítnasta sem ég man eftir og er þó um nægt að velja. Hann klæddi sig í yfirhöfn og sagði mér að koma með sér útí bíl. Hann keyrði með mig í Suðurver og fór þar með mig inn á Hárgreiðslustofuna í Suðurveri. Þetta var á því Herrans ári 1980 og hárgreiðslustofan full af konum og karlmenn sjaldséðir gestir. Konan í afgreiðslunni horfði spyrjandi á okkur og spurði hvort hún gæti aðstoðað okkur.

-Ekki áttu hárkollu einsog á svona strák ? spurði pabbi og benti á mig

Ég settist á stól og konan mátaði á mig kollu

-Þetta er bara nákvæmlega eins og hárið á honum ! tilkynnti pabbi

Hún var auðvitað ekkert í líkingu við mitt raunverulega hár, með liðum og þar að auki kvenmanns kolla.“

Faðir Jóns lét Jón setja kolluna upp og keyrði hann kampakátur aftur niður í Glæsibæ

„Nú ætti þetta að vera í lagi sagði hann og keyrði í burtu en ég stóð eftir á bílastæðinu með nýju kolluna á hausnum, Hún tryggði mér samt vinnuna ekki aftur. Guðmundur verslunarstjóri horfði bara forviða á mig og stundi: „Elsku Jón, ég sem hafði bundið svo miklar vonir við þig.“

Jón segist hafa haldið upp á kolluna lengi og gjarnan sett hana upp á góðum stundum. Kollan sé nú löngu glötuð, en í dag fann Jón mynd af sér með kolluna og deilir því sögu hennar með vinum sínum á samfélagsmiðlum.