Sjá einnig: Sjálfstæðisflokkurinn missir herbergið
Þingflokkur Samfylkingarinnar, sem er fjölmennasti þingflokkurinn eftir kosningarnar 30. nóvember sl., fer í hið svonefnda bláa herbergi, stærsta þingflokksherbergið í Alþingishúsinu, sem Sjálfstæðisflokkurinn hefur haft til umráða í 84 ár, frá 1941, þremur árum áður en lýðveldið var stofnað.
Í tilkynningu frá Sjálfstæðisflokknum segir meðal annars:
„Augljóst er að breyttar reglur munu hvorki standast tímans tönn né einhvers konar breytingar á ríkisstjórn annað en þær reglur sem í gildi voru sem höfðu það að markmiði að koma í veg fyrir óþarfa rask og deilur innan þingsins. Nýjar reglur hafa engin slík sjónarmið að leiðarljósi.“
Þá er haft eftir Hildi Sverrisdóttir, þingflokksformanni Sjálfstæðisflokksins, að það hafi því miður sýnt sig að „Samfylkingunni sé í hinum ýmsu málum ekki mjög umhugað um reglur og hefðir“ á Alþingi.
„Reglur um þingflokksherbergi voru skýrar enda úrskurðaði skrifstofustjóri Alþingis að samkvæmt þeim ætti Sjálfstæðisflokkurinn að halda herbergi því sem hann hefur verið í síðan 1941,“ segir Hildur í tilkynningunni.
Hún heldur áfram:
„Þá bregst Samfylkingin við í krafti nýfengins meirihlutavalds síns og breytir með einu óvönduðu pennastriki reglunum til þess eins að taka herbergi Sjálfstæðisflokksins. Mér þykir þetta í raun með eindæmum lítilmannlegt en Sjálfstæðisflokkurinn ætlar ekki að eyða meiri tíma í þetta mál og þau þurfa að eiga við sig að hafa ákveðið að forgangsraða kröftum sínum og athygli á fyrstu dögum þingsins í að hafa af okkur þetta herbergi.“
Hildur hafði gefið til kynna að þingflokkur Sjálfstæðisflokksins gæti farið í setuverkfall ef herbergið yrði tekið af þeim. Miðað við ummæli Hildar hér að ofan verður ekkert úr því.
„Sjálfstæðisflokkurinn getur að sjálfsögðu unnið í öllum rýmum hússins að því aðhaldi sem nauðsynlegt er gagnvart nýrri ríkisstjórn. Við bara kveðjum því herbergið okkar í bili og óskum þeim velfarnaðar þar sem hefur verið góður andi í 84 ár og við vonum að bláu veggirnir verði þeim gæfuríkt leiðarljós í sínum störfum,“ segir Hildur í tilkynningunni.
Þá segir að endingu að flokkurinn óski Samfylkingunni velfarnaðar í þessu sögufræga rými og skilji eftir „smávegis innflutningsgjöf“ í tilefni tímamótanna en myndina af henni má sjá hér að neðan.
