Athygli vekur að í nýjasta hefti tímaritsins Sögu sem kom út á dögunum skrifar Sigurður Gylfi Magnússon prófessor í sagnfræði við Háskóla Íslands mjög þunga ádrepu á kollega sinn í Háskólanum Steinunni Kristjánsdóttur fornleifafræðing og bók hennar Dauðadóminn sem kom út á síðasta ári og fjallaði um morðmálin á Sjöundá.

Sigurður Gylfi gagnrýnir harðlega fræðilegar forsendur verksins sem hefur vakið mikla athygli frá því að það kom út, meðal annars fékk bókin langa umfjöllun í bókmenntaþættinum Kiljunni hjá Agli Helgasyni.

Sigurður Gylfi gagnrýnir Steinunni fyrir fræðilegt fúsk og finnst yfirlýsingargleði hennar um morðin yfirgengileg. Steinunn vill meina að Bjarni morðingi hafi í raun ekki drepið neinn heldur hafi hann verið hafður fyrir rangri sök. Sigurður Gylfi gagnrýnir forsendur hennar harðlega og telur skrifin ekki sæma fræðimanni. Innan Háskólans bíða margir þess með eftirvæntingu hverju Steinunn svarar þessari gagnrýni sem er óneitanlega óvenju hörð og óvægin.

Í sama hefti Sögu birtir Ragnhildur Hólmgeirsdóttir sagnfræðingur og starfsmaður Þjóðskjalasafns Íslands ritdóm um bók Steinunnar og er sömuleiðis afar gagnrýnin á verkið í heild sinni.