Associated British Foods, móðurfyrirtæki fatarisans Primark, hefur gefið það út að jólasala fyrirtækisins hafi valdið miklum vonbrigðum og það muni hafa talsverð áhrif á ársuppgjör fyrirtækisins og spár fyrir næsta ár. Segir í yfirlýsingu fyrirtækisins að viðskiptavinir virðist hafa verið „varkárir“ fyrir þessi jól og þá hafi veður haft áhrif á söluna. Til að mynda hafi milt veðurfar í október og nóvember haft þau áhrif að lítið seldist af vetrarvörum.

Daily Mail greinir frá og hefur eftir greinanda að Primark hafi lengi vel verið krúnudjásnið í eignasafni ABF en ljóminn virðist vera að dofna.

Primark nýtur talsverðra vinsælda hjá Íslendingum, ekki síst útaf hagstæðu verði, en samkeppni frá netverslum eins og Shein og Temu virðist vera að hafa áhrif á keðjuna stóru sem er ekki jafnsamkeppnishæf í netsölunni.

Hlutabréfaverð í Primark lækkaði um 15 prósent á síðasta ári og ljóst að þessi nýju tíðindi munu gera lítið til að auka tiltrú fjárfesta á fyrirtækinu.