Flokkur fólksins uppfyllir ekki skilyrði laga til að fá styrki úr ríkissjóði sem stjórnmálaflokkur. Þetta má rekja til þess að flokkurinn er skráður sem frjáls félagasamtök en ekki stjórnmálasamtök. Frá þessu greindi Morgunblaðið í gær en málið hefur vakið töluverða athygli.
Lögum sem gilda um styrkina var breytt árið 2022 sem þýðir að í þrjú ár hefur flokkurinn fengið alls 240 milljónir úr ríkissjóði án þess að eiga í raun rétt á því.
Ekki er um einsdæmi að ræða. RÚV bendir á að Vinstri græn voru ekki skráð sem stjórnmálasamtök fyrr en á síðasta ári, en þá var skráningunni breytt eftir ítrekaðar athugasemdir ríkisendurskoðanda.
Eftir frétt Morgunblaðsins var tilkynnt að Flokkur fólksins fær ekki styrkinn í ár, en hann hefði að óbreyttu numið 70 milljónum króna.
Inga Sæland hefur boðað breytingar á skráningu eftir landsfund flokksins í febrúar. Hún óttast ekki að vera gert að skila styrkjunum enda hafi enginn vitað um þennan formgalla fyrr en nú.
Helga Vala Helgadóttir, lögmaður og fyrrum þingmaður Samfylkingarinnar, segir stórri spurningu ósvarað í málinu.
Hún skrifar á Facebook að stjórnmálasamtökum beri á ári hverju að skila ársreikningi til ríkisendurskoðanda. Skilaskyld eru stjórnmálasamtök eins og þau eru skilgreind í lögum. Hvernig megi það vera að ríkisendurskoðun hafi ekki gert athugasemd við skráningu Flokks fólksins?
„Nú hefur verið bent á það að Flokkur fólksins sé ekki skráður sem stjórnmálasamtök heldur félagasamtök og því ekki hægt að afgreiða fjárveitingar til samtakanna skv. ofangreindum lögum (þrátt fyrir að það hafi verið gert árlega frá stofnun).
Hvernig má það vera að ríkisendurskoðun hafi ekki flaggað þessu? Ég veit að RE bendir flokkum á ef fjárstuðningur sem tengist sömu kennitölu fer yfir leyfilega viðmiðunarfjárhæð, til dæmis ef viðkomandi hefur stutt flokkinn og svo til dæmis söfnun aðildarfélags á staðnum.
En embættið virðist ekki taka eftir félagaformi stjórnmálahreyfingarinnar sem verið er að rannsaka hjá embættinu? Er það ekki ögn sérstakt?
(Viðbót: Ég er ekki að skjóta Flokk fólksins heldur að benda á að enginn gerði athugasemd við þetta fyrr en, að því er virðist, Mogginn fór af stað. Þá allt í einu er fjárstuðningur óheimill. Hvar var embættismaður ríkisins í öll þessi ár?) “
Helga bætir við í athugsemd að það séu svo fjölmargir sem koma að ársreikningum félagasamtaka sem hefðu getað vakið athygli á málinu, svo sem Ríkisendurskoðun, Fjársýsla ríkisins og svo endurskoðandinn sem staðfestir ársreikninga.
