Þórður Snær Júlíusson tekur á næstunni við starfi framkvæmdastjóra þingsflokks Samfylkingarinnar. Þórður Snær var ofarlega á framboðslista flokksins í Reykjavík fyrir kosningarnar í nóvember en lýsti því yfir að hann myndi ekki taka sæti á Alþingi í kjölfar mikillar umfjöllunar um óviðeigandi bloggskrif hans á árunum 2004 til 2007. Var í skrifunum meðal annars fjallað með niðrandi og óviðurkvæmilegum hætti um nafngreindar og þekktar konur. Sigmundur Ernir Rúnarsson tók sæti Þórðar Snæs á Alþingi.

Þórður Snær segir í tilkynningu á Facebook-síðu sinni:

„Ég mun taka formlega við stöðu framkvæmdastjóra þingflokks Samfylkingarinnar eftir að þing verður sett 4. febrúar næstkomandi, en er þó þegar byrjaður að starfa sem slíkur. Líkt og ég hef áður greint frá þá ætla ég ekki að taka það þingsæti sem ég hlaut í kosningunum í nóvember og mun segja af mér þingmennsku við fyrsta mögulega tækifæri, sem verður þann dag.

Ég hlakka mjög til að hjálpa við að breyta samfélaginu til hins betra með öflugri ríkisstjórn Kristrúnar Frostadóttur og frábærum hópi þingmanna.“