En einn þingmaður Demókrata hefur farið aðrar leiðir og hefur ekki stutt allar aðgerðir flokkssystkina sinna.
Þetta er John Fetterman sem situr í öldungadeild Bandaríkjaþings fyrir Pennsylvania.
Fetterman, sem markaðssetur sig sem hettuklæddan baráttumann fyrir verkafólk í Ryðbeltinu svokallaða og stærir sig af skoðunum sem eru vinstra megin við miðju, hefur verið vinveittasti þingmaður stjórnarandstöðunnar þegar kemur að samskiptunum við Trump.
Hann hefur meðal annars heimsótt Trump á heimili hans í Mar-a-Lago í Flórída.
Hann var eini Demókratinn sem studdi tilnefningu Trump á Pam Bondi sem dómsmálaráðherra og aðrir ráðherrar fengu einnig atkvæði frá honum á meðan flestir aðrir þingmenn Demókrata greiddu atkvæði gegn þeim.
Hann gagnrýndi flokkssystkini sín fyrir að halda á mótmælaspjöldum þegar Trump ávarpaði þingið og sagði þetta vera „sorglegt sjálfsmark“. „Við erum að verða eftirlíking af þjófavarnarkerfi í bíl, sem enginn veitir athygli,“ skrifaði hann á samfélagsmiðla eftir ávarp Trump.
Hvað varðar pólitík Trump þá hefur Fetterman verið hliðhollari Trump en flestir aðrir Demókratar. Hann studdi refsiaðgerðir Trump gegn Alþjóðasakamáladómstólnum, hann hefur ekki viljað gagnrýna umdeildar áætlanir Trump varðandi Gasa og nýlega varð hann fyrsti Demókratinn til að gera möguleika stjórnarandstöðunnar á að gera Trump lífið erfitt að engu.
Þingið þurfti að samþykkja fjárlög til að framlengja fjármögnun ríkisrekstrarins. Ef þau hefðu ekki verið samþykkt hefði þurft að stöðva starfsemi alríkisins og tugir þúsunda ríkisstarfsmanna hefðu verið sendir heim.
Demókratar höfðu hér tækifæri til að koma höggi á Trump en til þess þurftu allir þingmenn flokksins í öldungadeildinni að greiða atkvæði gegn fjárlögunum. En Fetterman vildi ekki taka þátt í því og tilkynnti að hann myndi styðja fjárlagafrumvarp Repúblikana og varaði við afleiðingunum af því að stöðva starfsemi alríkisins. Það er eins og að „brenna þorpið til að bjarga því“, sagði hann.
Hann hefur haldið fast í andstöðu sína við hin frjálslegu vopnalög í Bandaríkjunum og hefur stutt Ísrael í stríðinu við hryðjuverkasamtökin Hamas á Gasa.
Í nýlegu viðtali við Wall Street Journal sagði hann að stuðningur hans við Ísrael og það hvernig hann nálgast Donald Trump og stefnumál hans, hafi kostað hann fjárframlög frá Demókrötum í grasrót flokksins.
