Sigmar Guðmundsson þingflokksformaður Viðreisnar segir 350 milljónir sparast árlega við að fækka ráðuneytum um eitt. Segir hann upphæðina ekki stóra í heildarsamhenginu, en táknræna.

„Nákvæmlega sömu upphæð verður nú varið í að tryggja að meðferðarstarfi fyrir fólk með vímuefnavanda verði ekki lokað í sumar eins og gerðist í fyrra,“ segir Sigmar í grein sinni á Vísi.

„Þessir peningar eiga meðal annars að renna til SÁÁ, Krýsuvíkur og Hlaðgerðarkots. Að auki verður göngudeild Landspítala styrkt, Laufeyjarteymið, Ylja og Frú Ragnheiður. Úrræðum er fjölgað og þau styrkt. Biðlistar styttir. Skýr skilaboð um það sem koma skal. Skynsamlegri nýtingu fjármagns til þess að styrkja heilsu og velferð almennings. Þetta er táknrænt því það er meiri þörf fyrir pláss í meðferð en að fjölga stólunum við ríkisstjórnarborðið.“

Rifjar Sigmar upp að í kjölfar kosninga árið 2021 hafi ráðuneytum verið fjölgað um eitt. 

„Framsókn vann kosningasigur og við því var brugðist með því að þenja stjórnarráðið út. Stækka báknið og bæta við stóli við ríkisstjórnarborðið. Breyttum valdahlutföllum var mætt með því að auka ríkisútgjöld. Það var auðvitað líka mögulegt að bregðast við sterkari stöðu Framsóknar með því að fækka ráðuneytum VG og Sjálfstæðisflokksins og tryggja þannig að stjórnin tæki mið af úrslitunum. En þrátt fyrir að í þeirri ríkisstjórn hafi verið nokkuð um áhugafólk um hagkvæmari ríkisrekstur þá var það meira í orði en á borði,“ segir Sigmar sem segir kjörið tækifæri til hagræðingar ekki hafa verið nýtt.

Annað sé upp á teningnum hjá núverandi ríkisstjórn Viðreisnar, Samfylkingar og Flokks fólksins sem eins og áður sagði fækka ráðuneytum um eitt.

„Ekki til að halda utan um einhver valdahlutföll, eins og áður, heldur til að sýna með skýrum hætti að það á að fara betur með fjármuni almennings. Þar er sjálft stjórnarráð auðvitað ekki undanskilið. Því eftir höfðinu dansa limirnir.“