Það er ekki nóg að horfa bara á auglýsingastofuna í sambandi við auglýsingar og markaðssetningu heldur verður að horfa til þess að fleiri koma að. Alltaf þarf að sprengja sköpunarkraftinn út og að því kemur fólk úr hinum skapandi greinum. Efni sem búið er til hér á landi er sambærilegt við það besta erlendis en gert fyrir minni pening. Anna Kristín Kristjánsdóttir, formaður Samtaka íslenskar auglýsingastofa (SÍA), er gestur Ólafs Arnarsonar í hlaðvarpi Markaðarins á Eyjunni.

Hér er hægt að hlusta á brot úr þættinum:

Anna Kristin Kristjansdottir - 4

„Ef maður tekur markaðsmál á Íslandi svona yfirhöfuð þá erum við á heimsmælikvarða. Það er alveg merkilegt því við höfum oft heyr – ég var t.d. á ráðstefnu í desember hjá Sambandi evrópskra auglýsingastofa – að okkar markaðsefni sem kemur héðan er á pari við það sem þykir verulega gott annars staðar,“ segir Anna Kristín.

Hún segir kostnaðinn við að búa til þetta efni hér á landi einungis vera hluta þess kostnaðar sem slíkt kosti annars staðar. „Við einhvern veginn bara hlaupum í þetta og gerum gott stöff og skapandi geirinn í heild á Íslandi er mjög öflugur. Auglýsingabransinn er náttúrlega ekki bara auglýsingabransinn. Við vinnum mjög náið með í raun og veru öllum í skapandi greinum og sköpun er náttúrlega bara listform og margir sem starfa í auglýsingageiranum eru listamenn og listakonur og starfa jafnvel samhliða sem slík. Talandi um kvikmyndagerðarfólk og leikstjóra og stílista og förðunarfræðinga, leikmyndahönnuði, búningahönnuði, við vinnum með öllum þessum aðilum og þetta er oft fólk sem er í mörgum verkefnum, mikið af einyrkjum. Þetta er mjög lifandi markaður.

Anna Kristín segir ekki hægt að horfa bara á auglýsingastofuna. Það verði að horfa á hana og því til viðbótar alla þá sem koma að. „Það þarf alltaf að leita eftir besta talentinu, hvert verkefni þarf sitt talent og það þarf að finna það.“

Já, það hlýtur að vera mjög takmarkandi að vera bara með hóp af fólki sem vinnur saman á skrifstofu og leita aldrei út fyrir þann hóp.

„Ja, það er bara einhæft ef þú ert ekki að sprengja sköpunarkraftinn út, alltaf.“

Hægt er að hlusta á hlaðvarpið í heild sinni hér: