Dóra Björt Guðjónsdóttir, oddviti Pírata í Reykjavík, sagðist í viðtali við RÚV í gær vera tilbúin að axla ábyrgð í myndun nýs meirihluta í borginni.
„Ég er tilbúin til þess að axla ábyrgð. Borgarbúar eiga betra skilið en eitthvert uppnám, óstjórn og ringulreið. Við viljum auðvitað axla þá ábyrgð sem okkur hefur verið falin og halda því áfram,“ segir Dóra Björt.
„Hinar fimm fræknu eru bara búnar að sitja og spjalla og finna út úr því hvernig eigi að koma ró á stjórn borgarinnar. Konurnar verða að koma og taka til þegar karlarnir eru með vesen og skella öllu í uppnám,“ sagði Dóra Björt hlæjandi aðspurð um hverjr hefðu setið fund heima hjá Heiðu Björgu Hilmisdóttur, oddvita Samfylkingarinnar.
„Það er mikilvægt að vanda sig,“ segir Dóra Björt þegar henni er bent á að það þurfi að vera starfandi stjórn í borginni. „Við kunnum að setja hagsmuni borgarbúa í fyrsta sæti og það er gott að einhver geri það, segi ég bara. Þannig að það yrði að liggja fyrir mjög skýrt plan, aðgerðaáætlun sem væri hægt að koma í framkvæmd á stuttum tíma.“
Aðspurð um að flugvöllurinn hafi haft úrslitaáhrif varðandi síðasta meirihluta og hvort konurnar fimm séu sammála um framtíð hans segir Dóra Björt:
„Það var nú bara átylla. Og það er alveg ljóst að það tekur meira en 14 mánuði að flytja flugvöll þannig að það sé ekkert sem stendur í vegi fyrir neinum verkefnum núna.“
Aðspurð um af hverju Ragnar Þór Ingólfsson, þingmaður Flokks fólksins, mætti á fundinn skellihlær Dóra Björt og segir hann bara svo ógeðslega skemmtilegan. „Hann er bara fínn og með hugmyndir og pælingar og traustur maður sem þekkir vel til ýmissa málefna, þannig að okkur fannst bara gaman að fá hann í kaffislabbirassið.“
Ásgeir Þór Árnason, íbúi í Árskógum 7 er alls ekki sáttur með Dóru Björt. Hann deilir ofangreindu viðtali við Dóru Björt, og segir hana einfaldlega eiga að skammast sín.
„Hún talar kokhraust um að axla ábyrgð. Talar í Silfrinu um að það þurfi að vera birta í íbúðarhúsnæði, hún er brött, með græna gímaldið, sem minnisvarða um ábyrg störf sín fyrir Reykjavíkurborg og á örugglega fleiri mistök á sínum herðum, borgarbúum til mikils ama,“ segir Ásgeir Þór, en sem kunnugt er er Græna gímaldið svokallaða nánast í bakgarði hans og annarra íbúa við Árskóga 7 í Breiðholti. Enginn hefur enn borið ábyrgð á byggingunni, en stjórnsýslunefnd var skipuð til að kanna málið.
„Hún ætti að skammast sín, hætta þessu hrokatali og ætli hún sér að mynda meirihluta hér í borginni ætti hún að fara á námskeið þar sem henni er kennt auðmýkt – flokkar hafa þurrkast út í kosningum fyrir minna, en þetta og væri það sennilega best ef hún vill hafa hag flokksins að leiðarljósi, þá væri það að segja af sér – ábyrgð fylgir störfum sem þessum og etv. er kominn tími á að gera meiri hæfniskröfur til þeirra sem fara með völd í borgar- og sveitastjórnum landsins.“
Af græna gímaldinu er það að frétta að Innri endurskoðun Reykjavíkurborgar var á fundi borgarstjórnar 7. janúar falið að gera ítarlega stjórnsýsluúttekt á skipulagsferlinu er varðar Álfabakka 2a, þar sem hið umdeilda vöruhús Haga er. Ekkert bólar á úttektinni sem átti að sögn Einar Þorsteinssonar þáverandi borgarstjóra að liggja fyrir í lok janúar. Byggingarfulltrúi borgarinnar stöðvaði framkvæmdir að hluta þann 31. janúar, framkvæmdir við fyrirhugaða kjötvinnslu á jarðhæð hússins vegna skorts á mati á umhverfisáhrifum.
