„Alvarlegt ofbeldi ungmenna virðist alltaf koma okkur á óvart, rétt eins og sífellt lakari námsárangur grunnskólabarna í lestri og reikningi. Þegar við erum í uppnámi myndast kjörlendi fyrir tækifærissinna og populista til að láta ljós sitt skína,“ 

segir Brynjar Níelsson samfélagsrýnir og fyrrum þingmaður og aðstoðarmaður dómsmálaráðherra. 

Í færslu sem hann skrifar á Facebokk segir Brynjar öllum ljóst að enginn skortur á tækifærissinnum í pólitík. En færslu sína skrifar Brynjar í tilefni hörmulegrar árásar á Menningarnótt þar sem þrjú ungmenni voru stungin og eitt þeirra, 17 ára stúlka, lést af sárum sínum sex dögum síðar.

„Nú ætla þeir að stöðva ofbeldið eins og þeir ætluðu að gera Ísland fíkniefnalaust á sínum tíma. Tækifærissinnar líta aldrei svo a að við berum sjálf ábyrgð á hegðun okkar og foreldrar beri einhverja ábyrgð á börnum sínum, heldur að skólarnir og „kerfið“  hafi brugðist. Því þurfi meiri fjármuni í „kerfið“  til að koma í veg fyrir ofbeldi,“ segir Brynjar.

Ekki kerfið sem hefur brugðist

Hann segir að það séu ekki einhver óskilgreind kerfi sem hafa brugðist. 

„Úrræði og aðstoð við þá sem glíma við erfiðleika í lífinu hefur aukist jafnt og þétt síðustu ár og áratugi. Hvert og eitt okkar verður að líta meira í eigin barm og taka meiri ábyrgð í stað þess að skella alltaf skuldinni á aðra eða „kerfið“.  Þá fyrst næst einhver árangur í baráttunni.

Lengi hefur verið vitað að maðurinn er ófullkominn og átt í bölvuðu basli með að búa í samfélagi. Áhersla á kristileg gildi í uppeldinu ásamt ást, umhyggju og hæfilegum aga er örugglega farsælt veganesti fyrir hvern einstakling út í lífið og fyrir samfélagið í heild.“

Brynjar bendir svo öllum á sem misboðið er yfir færslu hans að opið er fyrir athugasemdir og svívirðingar á Facebook hans.