Áslaug Arna Sigurbjörnsdóttir háskóla-, iðnaðar- og nýsköpunarráðherra ritaði grein sem birtist í Morgunblaðinu í morgun en hún birtir sama texta sem færslu á Facebook-síðu sinni. Áslaug Arna verður í færslunni einkum tíðrætt um stöðu hennar flokks, Sjálfstæðisflokksins, en athygli vekur að hún fjallar einnig um hvað varð til þess að hún ákvað að hella sér út í stjórnmálin. Hún fjallar einnig um ýmislegt sem hún hefur mátt þola vegna stjórnmálastarfa sinna, meðal annars hefur verið hrækt á hana og hún orðið fyrir alvarlegum hótunum.
Um ástæður þess að hún fór út í stjórnmál skrifar Áslaug Arna:
„Ég var mjög ung þegar ég fór í gegnum mjög erfiða og persónulega reynslu sem leiddi til þess að málefni samfélagsins fönguðu hug minn allan. Ég skammast mín ekki fyrir það. Þessi reynsla hefur ekki bara verið ómetanleg fyrir mig til að skilja stjórnmál og stjórnsýslu heldur hefur hún veitt mér dýpri skilning á öllum krókum og kimum samfélagsins. Gert mig næmari fyrir ólíkum aðstæðum fólks.“
Þarna er Áslaug Arna mögulega að vísa til fráfalls móður hennar en hún greinir síðan frá sumu af því sem dunið hefur á henni þau átta ár sem hún hefur setið á þingi og í ríkisstjórn:
„Í þau átta ár sem ég hef setið á þingi og síðar í ríkisstjórn hef ég tekið þátt í ákvörðunum sem varða hundruð milljarða – alltaf með það fyrir augum að sjá og finna út úr því hvernig hægt er að nýta skattpeninga betur. Ég hef orðið fyrir hráka einstaklings sem ég mætti á gangstétt og hatrið skein úr augnaráðinu. Ég hef yfirgefið veitingastað vegna konu sem veittist svo harkalega að mér að ég óttaðist um öryggi mitt. Ég hef brotnað saman þegar lygar um persónu mína fara á flug. Ég hef myndað bandalög þvert á hugmyndafræðilega sannfæringu til að ná fram einhverjum árangri í þágu þeirra hugmynda sem ég trúi á. Þrátt fyrir málamiðlanir hef ég þó aldrei misst sjónar af þeim hugsjónum sem eru drifkraftur minn í stjórnmálum.“
