Nokkra mínútna hlé var gert á þingfundi um klukkan 16 vegna mótmæla á þingpöllum. Þar höfðu mótmælendur vakið athygli á sér með hrópum og köllum og einn hafði klifrað yfir handrið og hékk yfir þingsal.

Ásmundur Friðriksson, þingmaður Sjálfstæðisflokks, birti myndband af uppákomunni og sagði þingmenn slegna.

Nú stendur yfir umræða um breytingar á lögum um útlendinga. Málefni innflytjenda og hælisleitenda hafa staðið þjóðinni nærri undanfarnar vikur og skoðanir verulega skiptar.

Eyjólfur Ármannsson, þingmaður Flokks fólksins, birti einnig myndir af mótmælunum. Telur Eyjólfur að mótmælendur hafi raskað frið Alþingis.

Á útsendingu Alþingisrásarinnar mátti sjá er um 15:47 heyrðust hróp og köll undir ræðu Guðrúnar Hafsteinsdóttur, dómsmálaráðherra, þar sem hún var sökuð um miskunarleysi í garð útlendinga, eða um að hafa ekki hjarta.

Í kjölfarið reis forseti Alþingis, Birgir Ármansson, úr sæti og tilkynnti að fundi yrði frestað svo ró mætti ná í salinn. Í kjölfarið var hljóð tekið af útsendingu og útsending svo rofin.

Útsending hófst aftur 16:05 og hefur gengið áfallalaust síðan.