Haley, sem tekst á við Donald Trump um að verða forsetaframbjóðandi Repúblikanaflokksins í haust, gæti kannski notað þessa aðferð til að takast á við Trump sem hefur tekið upp gamla siði og uppnefnir Haley og dreifir ótrúlegum samsæriskenningum um hana.
Árum saman réðst hann á Barack Obama, fyrrum forseta, og sagði hann vera fæddan í Kenía. Nú er hann farinn að segja að Haley sé ekki sannur Bandaríkjamaður en hún er dóttir indverskra innflytjenda en fædd í Bandaríkjunum.
Í tengslum við forvalið í New Hampshire nýlega sáði Trump efasemdum á samfélagsmiðlum um hvort Haley sé kjörgeng. Byggir hann þetta á skýrslu af heimasíðunni The Gateway Pundit, sem er þekkt fyrir að birta samsæriskenningar. Í skýrslunni er því ranglega haldið fram að Haley megi ekki gegna embætti forseta því indverskir foreldrar hennar hafi ekki verið bandarískir ríkisborgarar þegar hún fæddist í Suður-Karólínu.
Staðreyndin er að um leið og Haley fæddist í Suður-Karólínu varð hún bandarískur ríkisborgari. Hún uppfyllir því skilyrði stjórnarskrárinnar um að frambjóðandi verði að hafa fæðst sem bandarískur ríkisborgari, annað hvort í Bandaríkjunum eða barn bandarískra foreldra, vera orðin 35 ára og að hafa búið í Bandaríkjunum í minnst 14 ár.
Haley fæddist í janúar 1972 og fékk nafnið Nimarata Nikki Randhawa. Hún notar millinafn sitt og eftirnafn eiginmanns síns, Michael Haley, en Trump kýs að nota indverskt hljómandi skírnarnafn hennar, Nimarata. Ekki er enn hægt að segja hvort þetta skili honum einhverjum ávinningi eða muni koma honum í koll. Trump virðist sjálfur fullviss um að ef hann endurtaki staðlausar fullyrðingar sínar nógu oft muni það sá svo miklum efasemdum að einhverjir kjósendur muni að lokum trúa honum.
CNN telur að markmiðið með móðgunum og uppnefnum sé að reyna að láta andstæðingana virðast öðruvísi en þeir hvítu kjósendur, sem eru allsráðandi í Repúblikanaflokknum, sem Trump treystir á. Það er látið hanga í loftinu að andstæðingarnir séu ekki sannir Bandaríkjamenn.
