Samstarfsfólk Guðna Bergssonar á lögmannsstofu hans í Lágmúla 7 í Reykjavík hefur sent frá sér yfirlýsingu þar sem lýst er fullum stuðningi við framboð Guðna til formennsku í KSÍ, en kosning fer fram síðar í dag.

Yfirlýsingin birtist m.a. á facebook síðu Ástu Magnúsdóttur, samstarfskonu Guðna. Þar stendur m.a.: „Betri mann í samstarfi og samskiptum er ekki hægt a hugsa sér, kemur fram við fólk af kurteisi og virðingu, léttur og skemmtilegur.“

Samstarfsfólk hans segir erfitt að sitja undir því að fólk sem ekki þekki Guðna felli dóma um hann út frá einu fjölmiðlaviðtali þar sem hann hafi fjallað um viðkvæmt mál og nálgun hans hafi byggst á því að virða forræði málsaðila og virða trúnað sem hann hafði heitið.

„Fyrir okkur, sem þekkjum Guðna og hans mannkosti, er erfitt að sitja þegjandi undir því þegar fólk sem þekkir hann ekki telur sér fært að dæma persónu hans og viðhorf út frá einu fjölmiðlaviðtali. Í þessu viðtali var fjallað um viðkvæm málefni sem Guðni kaus að nálgast eins og lögmaður, þ.e. virða forræði málsaðila og trúnað sem hann hafði heitið.“

Samstarfsfólkið lýsir þeirri fullvissu sinni að Guðni bjóði fram krafta sína til starfa í knattspyrnuhreyfingunni fullur áhuga og einlægni, reynslunni ríkari.

Mikil, harka hefur færst í kosningabaráttuna innan KSÍ og virðast sumir frambjóðendur beita ýmsum meðulum til að koma höggi á mótherja sína. Eyjan hefur í vikunni fjallað um kosningabaráttuna og þær aðferðir sem beitt er, sjá hér og hér.

Kosning formanns KSÍ fer fram í Framheimilinu um kl. 17 í dag.

Hér að neðan má sjá stuðningsyfirlýsinguna við Guðna á facebook síðu Ástu Magnúsdóttur. Um hádegið höfðu vel á annað hundrað manns líkað við hana: