Ásgeir Runólfsson hefur verið skipaður skrifstofustjóri á skrifstofu fjárlaga og rekstrar í félags- og vinnumarkaðsráðuneytinu. Frá þessu er greint á vef Stjórnarráðsins en Ásgeir er skipaður af Áslaugu Örnu Sigurbjörnsdóttur, háskóla-, iðnaðar- og nýsköpunarráðherra, settum félags- og vinnumarkaðsráðherra. Bjarni Benediktsson er starfandi félags- og vinnumarkaðsráðherra en ákvað að víkja sæti við meðferð og töku ákvörðunarinnar á grundvelli vanhæfis.

Embætti skrifstofustjóra var auglýst laust til umsóknar þann 3. september. Alls bárust 16 umsóknir en fjórir drógu umsókn sína til baka. Ráðgefandi hæfisnefnd var skipuð til að leggja mat á hæfni umsækjenda og að loknu heildarmati og viðtölum var það mat ráðherra að Ásgeir væri hæfastur.

Um feril Ásgeirs segir í tilkynningu:

„Ásgeir er með meistarapróf í hagfræði frá Háskóla Íslands og hefur lokið grunnnámi í verkfræði frá sama skóla. Hann kemur úr starfi staðgengils skrifstofustjóra á skrifstofu fjármála og innri rekstrar í háskóla-, iðnaðar- og nýsköpunarráðuneytinu. Þar sá hann um að stýra teymi sem starfaði þvert á ráðuneytið sem hélt utan um fjárlagagerð og önnur verkefni tengd lögum um opinber fjármál. Áður starfaði Ásgeir m.a. í fjármála- og efnahagsráðuneytinu á skrifstofu opinberra fjármála og við stjórnendaráðgjöf hjá Capacent.“