Halla Tómasdóttir, forseti Íslands, ætlar að ræða við formenn annarra flokka áður en hún tekur afstöðu til þingrofstillögu sem Bjarni Benediktsson, forsætisráðherra, bar upp við hana í morgun. Þetta sagði  hún í stuttu ávarpi eftir fund hennar og Bjarna.

Hún segir að Bjarni hafi lagt til að þing yrði rofið og gengið yrði til kosninga. Eins hafi Bjarni lagt til að ríkisstjórnin sitji áfram. Halla segist fyrst ætla að ræða við aðra formenn áður en hún ákveður hvort hún samþykkir tillöguna. Ákvörðunar er að vænta síðar í vikunni en Halla tók ekki við spurningum frá blaðamönnum enda sagðist hún ekki hafa nokkru við að bæta að svo stöddu.

Halla stefnir á að funda með formönnum allra flokka á Alþingi í dag á skrifstofu sinni á Sóleyjargötu. Fyrsti fundur hefur verið boðaður klukkan 10:30 en að svo stöddu liggur ekki fyrir í hvaða röð formennirnir koma til fundar við forseta.

Bjarni segir í samtali við Vísi að hann eigi eftir að funda með formönnum Framsóknar og Vinstri Grænna í dag og ef í ljós kemur að engin áhugi er til staðar hjá ríkisstjórnarflokkunum að starfa saman fram að kosningum þá muni hann biðjast lausnar. Það sé þó mikilvægt að ná að klára fjárlög og fjármálaáætlun fyrir kosningar.