Skotin hafa í dag gengið á milli borgarfulltrúanna Dóru Bjartar Guðjónsdóttur og Kjartans Magnússonar út af banaslysi sem átti sér stað á Sæbraut um helgina, er gangandi vegfarandi varð fyrir bíl.
Kjartan hafði í viðtali við Morgunblaðið vísað til þess að flokkur hans, Sjálfstæðisflokkurinn, hafi lengi talað fyrir auknu öryggi á þessu svæði og það sé hræðilegt að það þurfi banaslys til að koma umræðunni um svæðið aftur að stað.
Dóra Björt sakaði þá Kjartan um tvískinnung, enda hafi Sjálfstæðisflokkurinn ekki barist fyrir öryggi gangandi vegfarenda heldur viljað greiðka fyrir umferð einkabílsins.
Sjá einnig: Sakar Sjálfstæðismenn um tvískinnung og segir þá hluta af vandanum
Kjartan hefur nú svarað gagnrýninni í samtali við Vísi en hann segir Dóru fara með rangt mál enda hafi hann alltaf kallað eftir auknu öryggi á gatnamótum Sæbrautar og Kleppsmýrarvegar.
„Við vildum bæta öryggi gangandi vegfarenda með hnapp og snjallljósastýringu á umferðarljósunum og svo er sú tillaga felld af meirihlutanum. Það er ótrúlegt að tæpu ári síðar er maður sakaður um það að vinna gegn hagsmunum gangandi vegfaranda þegar við lögðum fram tillögu sem vildi ganga lengra.“
Núverandi ljósastýring á svæðinu byggi á klukkukerfi þar sem vegfarendur fá 15 sekúndur til að þvera götuna.
„Mér finnst afskaplega ósanngjarnt og rangt að saka mig um einhvern tvískinnung.“
