„Það hefur verið sannur heiður að leiða Vinstrihreyfinguna – grænt framboð síðan í vor. Ég hef hins vegar tekið þá ákvörðun að bjóða mig ekki fram til formanns að þessu sinni. Ég hef sinnt þessu hlutverki af auðmýkt en tel þessa ákvörðun rétta. Engum treysti ég betur til að leiða hreyfinguna okkar að loknum landsfundi en Svandísi Svavarsdóttur og ég hef greint henni frá þeirri afstöðu minni,“

segir Guðmundur Ingi Guðbrandsson félagsmála- og vinnumarkaðsráðherra.

Í færslu á Facebook segist Guðmundur Ingi vera stoltur af mörgu sem VG hefur áorkað undir hans forystu, „sérstaklega fjölmörgum mikilvægum þingmálum sem við kláruðum í vor, eins og breytingum á örorkulífeyriskerfinu, mannréttindastofnun og fjölmörgum kjarasamningstengdum málum sem munu auka jöfnuð og réttlæti í samfélaginu. Það hefur verið sérstaklega gefandi að vinna með félögum í VG í þessu hlutverki á vettvangi stjórnar, þingflokks, flokksráðs, svæðisfélaga og í samtölum við fólk vítt og breitt um landið. Allt fer þetta í reynslubrunninn og þakklætishólfið í hjartanu.“

„Ég er ekki að hætta í stjórnmálum, langt því frá,“ segir Guðmundur Ingi og segist hann munu áfram bjóða fram krafta sína sem varaformaður hreyfingarinnar og oddviti VG í Kraganum. 

„Ég brenn fyrir umhverfismálum, mannréttindum og félagslegum áherslum og vil áfram vinna þeim baráttumálum brautargengi í íslensku samfélagi.

Ég er þakklátur fyrir þau fjölmörgu tækifæri sem ég hef fengið til að hafa áhrif. Allar friðlýsingarnar sem umhverfisráðherra, lögfesting kolefnishlutleysis Íslands og það að skylda fyrirtæki og almenning til að flokka sorp. Og, í félags- og vinnumarkaðsráðuneytinu að koma á réttlátara og einfaldara örorkulífeyriskerfi sem snertir fólk um land allt og beðið hefur verið eftir í fjöldamörg ár – og ná í gegn fyrstu landsáætluninni í málefnum fatlaðs fólks. Nú hillir auk þess undir fyrstu stefnu Íslands í málefnum innflytjenda.“

Guðmundur Ingi segir að fleiri og sterkari raddir þurfi til að tala fyrir náttúrunni, réttindum hinsegin fólks, kvenna, fatlaðs fólks og innflytjenda, og berjast fyrir vinstri gildum þar sem við fáum öll raunverulega að vera með í samfélaginu.

 „Ísland þarf sterka félagshyggjustjórn á næsta kjörtímabili og ég vil taka þátt í að láta það gerast.“