Jóhann Páll Jóhannsson, þingmaður Samfylkingarinnar, segir að fjárlagaumræðan á Alþingi undanfarna daga hafi afhjúpað algjört skeytingarleysi ríkisstjórnarinnar í garð þeirra landsmanna sem hafa unnið slítandi störf um langa ævi.

Jóhann Páll vekur athygli á þessu í pistli sem birtist hjá Vísi þar sem hann rekur að ríkisstjórnin hafi á sama tíma gerst sek um annað hvort alvarlegt skilningsleysi á ellilífeyriskerfinu eða um auma tilraun til að slá ryki í augu eldra fólks.

Hefur þingmaðurinn vakið athygli á því að ríkisstjórnin ætli að lækka jöfnunarframlag til lífeyrissjóða vegna örorkugreiðslna um 4,7 milljarðar strax á næsta ári og afnema framlagið með öllu árið eftir.

„Ef fer sem horfir verða þannig lífeyrisréttindi í sjóðum verkafólks skert upp undir fjögur prósent.“

Formenn Framsóknar og Vinstri grænna haldi því fram að þessi lækkun muni ekki bitna á sjóðunum þar sem örorka er mikil. Jóhann Páll segir þau rök ekki halda neinu vatni. Fimm sjóðir séu með örorkutíðni yfir meðallagi; Gildi, Festa, Stapi, Lífeyrissjóður Vestmannaeyja og Lífeyrissjóður Rangæinga. Þessir sjóðir njóta í dag um 66 prósent af þessu jöfnunarfarmlagi.

„Mun eðli máls samkvæmt koma niður á flestum eða öllum þessum sjóðum og launafólki sem hefur greitt i þá.“

Jóhann Páll minnist eins á að boðuð hækkun á frítekjumarki eldri borgara, 11.500 krónur, sé sett fram með villandi hætti. Henni sé lofað sem kjarabót til eldri borgara sem gefi til kynna að allar þessar krónur muni skila sér inn á bankabækur eldri borgara. Það sé þó ekki svo í framkvæmd heldur muni raunveruleg kjarabót nema 3.500 krónum eftir skatt.

Nú standi yfir breytingar á örorkulífeyriskerfinu og greinilega ætli ríkisstjórnin að fjármagna þessa breytingu með því að seilast í ellilífeyri þeirra sem minnst mega við því. Þetta er fólkið sem hefur unnið erfiðustu störfin á lágmarkskaupi. Jóhann Páll lofar því að Samfylkingin muni standa fast gegn þessu áhlaupi á sjóði verkafólks.