Gunnar Smári Egilsson, fjölmiðlamaður og sósíalisti, segir það tákn um breytta tíma hversu seint hann fréttir af því þegar Moggin hrakyrðir menn og skammar. Skrifaði Gunnar Smári stutta sögu á Facebook-síðu sína um hvernig að hann hefði hitt mann í kjörbúð í gærkvöldi og þar hafi þetta verið til umræðu.

„Þessi maður hafði lent í slíku, Davíð Oddsson og hans pótintátar verið að skrifa um hvað hann væri arfavitlaus, en hann ekkert frétt af því, rakst á þetta fyrir tilviljun þegar hann var að renna yfir gamlan Mogga. Ég hef sömu reynslu, var t.d. líkt við Pol Pot um daginn en vissi ekki af því fyrr en að hálfgerður sérvitringur benti mér á það mörgum dögum síðar,“ skrifar fjölmiðlamaðurinn.

Vísar hann til Staksteina Morgunblaðsins frá 29. júlí síðastliðnum þar sem yfirskriftin var „Vinstri öfgamenn í Efstaleitinu“. Var tilvitunin á þessa leið: „Hlustendum Rúv. fyrirgæfist að halda að engir vinstriöfgamenn væru til í heiminum, þar fær enginn slíkan stimpil, sama hvað þeir ganga langt í ofstopanum; hvorki Stalín né Sólveig Anna Jónsdóttir, Pol Pot né Pale-Stína, Maduro né Gunnar Smári Egilsson.“

Gunnar Smári segir tímana breytta því áður fyrr hefði þessi pilla borist hratt til hans.

„Þegar Mogginn hafði einhver áhrif í íslensku samfélagi hefði maður orðið var við það að lenda í kvörn blaðsins, alla vega hefði manni verið bent á það. Nú gengur fólk um göturnar dögum og vikum saman alls óafvitandi um að ritstjóri Moggans hafi dæmt það vitlaust og hættulegt samfélaginu.“