Það er enn rífandi gangur í stærsta hagkerfi heims, því bandaríska. Samkvæmt því sem kemur fram í nýrri skýrslu, sem var birt á föstudag í síðustu viku, um stöðuna á vinnumarkaði þá er hún mun betri en spáð var.

Í mars urðu 303.000 ný störf til utan landbúnaðarins í landinu en því hafði verið spáð að störfunum myndi fjölga um 213.000.

Bureau of Labor Statistics birtir mánaðarlega skýrslu um þróunina á vinnumarkaðinum en þetta er lykilatriði þegar mat er lagt á þróun mála í bandarísku efnahagslífi.

Leita verður aftur til sjöunda áratugarins til að finna eins langan samfelldan tíma með litlu atvinnuleysi.

Í febrúar urðu 270.000 ný störf til og í janúar 256.000.