„Sex mánaða rekstraruppgjör fyrir tímabilið janúar-júní 2023 sýnir að fjárhagsstaða Reykjavíkurborgar er afar slæm. Ekkert lát er á glórulausri skuldasöfnun borgarinnar þrátt fyrir stórauknar tekjur. Ljóst er að taprekstri og skuldasöfnun Reykjavíkurborgar verður ekki snúið við á yfirstandandi ári,“ segir í tilkynningu sem Kjartan Magnússon, borgarfulltrúi Sjálfstæðisflokksins, hefur sent frá sér.
Kjartan bendir á að rekstur borgarinnar á fyrstu sex mánuðum ársins sé 12,8 milljörðum undir fjárhagsáætlun en borgin var rekin með 6,7 milljarða tapi fyrstu sex mánuði ársins.
Kjartan telur að skuldahækkun Reykjavíkurborgar gefi að mörgu leyti skýrari mynd af rekstrinum en sjálfur rekstrarreikningurinn: „Á einungis sex mánuðum, frá ársbyrjun til júníloka, hækkuðu skuldir borgarsjóðs um tuttugu milljarða króna (19.668.226.000) og skuldir samstæðu borgarinnar um tæpa 33 milljarða (32.567.704.000).“
Kjartan bendir á að skuldir borgarsjóðs áttu að nema 194 milljörðum við árslok en hafi þegar náð þeirri tölu í lok júní. „Ljóst er að skuldirnar munu aukast enn frekar á seinni helmingi ársins og líklegt er að fyrir árslok verði þær komnar yfir 200 milljarða króna,“ segir hann.
Kjartan segir ennfremur:
„Fjárhagsstaða Reykjavíkurborgar, jafnt borgarsjóðs og borgarfyrirtækjanna, er mikið áhyggjuefni. Ekkert sveitarfélag getur byggt rekstur sinn á lántökum árum og jafnvel áratugum saman eins og gerst hefur í Reykjavík. Og á tímum verðbólgu og hárra vaxta er slík stefna beinlínis hættuleg. Aldrei hefur verið mikilvægara að borgarstjórn Reykjavíkur nái saman um aðgerðir til að binda enda á langt tímabil taprekstrar og skuldasöfnunar.“
