Breytingar á skipulagi leikskólastarfs í Kópavogi hafa gengið vel og haft jákvæð áhrif. Þetta er fullyrt í tilkynningu frá Kópavogsbæ en þar kemur fram að flestir leikskólar sé fullmannaðir og dvalartími barna hefur styst verulega. Talsverð ólga varð meðal foreldra í bæjarfélaginu þegar ný gjaldskrá leikskóla var birt í byrjun ágúst. Þar var kveðið á um að sex tíma dvöl eða skemmri yrði gjaldfrjáls, fyrir utan fæðisgjald, en stigvaxandi hækkanir eftir dvalartíma fyrir foreldra sem þyrftu lengri vistun. Þýddi þetta hækkun um tugi prósenta fyrir sumar fjölskyldur.
Samkvæmt nýju gjaldskránni var ekkert dvalargjald fyrir fyrstu sex dvalarstundirnar, en fæðisgjaldið er 10.462 krónur. Fyrir 6,5 dvalarstundir var kostnaðurinn með fullu fæði orðinn 34.616 kr., fyrir 8 stundir er það 49.474 kr. og fyrir hámarksdvöl, 9 stundir, þarf að greiða 77.474 krónur.
Í áðurnefndri tilkynningu frá Kópavogi er fullyrt að breytingarnar hafi gert það að verkum að námsumhverfi og skipulag leikskóladags allra barna í leikskólum sé afslappaðra, áreiti minna og viðvera starfsfólks með börnum er meiri og rólegri. Með sama áframhaldi muni stöðugleiki og gæði í starfi leikskólanna aukast foreldrum og börnum til hagsbóta. Færri börn séu í leikskólum á morgnana og seinnipart dags sem skapi betri aðstæður og rólegra umhverfi fyrir þau börn sem dvelja lengur á leikskólanum. Þannig hafa breytingarnar haft jákvæð áhrif fyrir öll börn hversu langur sem dvalartíminn er.
„Þessar fyrstu niðurstöður eru afar jákvæðar sem bendir til þess að breytingarnar, sem byggja á tillögum starfshóps skipaður fulltrúum helstu hagsmunaðila, eru að skila árangri. Að mati leikskólastjóra gengur mönnun í leikskólum mun betur miðað við fyrri ár, dvalartími barna er að styttast og foreldrar eru að nýta sér aukinn sveigjanleika til að stytta daga vikunnar. Markmið breytinganna var að efla leikskólastarfið með betri mönnun og bættri þjónustu, ég trúi ekki öðru en að við séum að ná því markmiði.“ segir Ásdís Kristjánsdóttir, bæjarstjóri.
Dvalartími þriðjungs barna hefur verið styttur
Þá kemur fram að í dag séu tæplega 2.000 börn innrituð í leikskóla Kópavogs. Tæplega þriðjungur foreldra hefur stytt dvalartíma barna sinna og um 19% barna, eru nú skráð í 6 tíma eða minna á dag, samanborið við 2% í fyrra.
Meðaldvalarstundir barna, miðað við samþykktar umsóknir, hafa farið úr 8,1 tíma haustið 2022 niður í 7,5 tíma á dag. Á síðastliðnu skólaári voru 85% barna, um 1.700, í 8 tíma dvöl eða meira en í dag eru um 56% barna, um 1.100, í 8 tíma dvöl eða meira. Tekið er fram að umsóknir um breytingu á dvalartíma séu enn að berast og taka fjöldatölur því stöðugum breytingum.
