Origo hefur hlotið tilnefningu fyrir öfluga jafnréttisstefnu og aðgerðir í jafnréttismálum á Nordic Women in Tech Awards. Auk þess hafa sex Origo konur fengið tilnefningu sem er mikill heiður fyrir fyrirtækið. Þetta eru þær Dröfn Guðmundsdóttir, framkvæmdastjóri Mannauðssviðs, Hildur Björk Pálsdóttir, sérfræðingur í jafnlaunamálum, Ingibjörg Lilja Þórmundsdóttir, leiðtogi í breytingastjórnun, Kristín Hrefna Halldórsdóttir, forstöðumaður hjá gæða og innkaupalausnum, Maria Hedman vörustjóri og Unnur Sól Ingimarsdóttir framendaforritari.

Nordic Women in Tech Awards er samstarfsverkefni norrænna samtaka sem eiga það sameiginlegt að beita sér fyrir fjölgun kvenna í tæknistörfum og fjölga kvenfyrirmyndum í tækni. Origo er styrktaraðili viðburðarins sem er haldin árlega með það að markmiði að auka sýnileika framúrskarandi kvenna í tæknigeiranum og hvetja yngri kynslóðir kvenna til að sækja í tæknistörf.

„Við erum svo lánsöm hjá Origo að undanfarin ár hefur konum fjölgað mikið og þeim fylgir þvílíkur kraftur. Það er því mjög ánægjulegt að sjá hversu margar í okkar röðum eru tilnefndar í ár. Við erum allar mjög stoltar og þakklátar að fá þessa viðurkenningu sem hvetur okkur áfram til góðra verka,“ segir Dröfn Guðmundsdóttir, Framkvæmdastjóri Mannauðssviðs Origo

Sigurvegararnir verða valdir af alþjóðlegri dómnefnd skipuð tæknifólki úr ýmsum geirum á Norðurlöndunum og í ár fer verðlaunaafhendingin fram á Íslandi, nánara tiltekið í Hörpu, þann 9. nóvember næstkomandi.