Í tilkynningu Reykjavíkurborgar til kauphallarinnar frá því í morgun kemur fram að borgin muni, í samræmi við útgáfuáætlun 2023, efna til útboðs á skuldabréfaflokkunum RVK 53 1 og RVKN 35 1, miðvikudaginn 16. ágúst næstkomandi.

Heimild borgarinnar til lántöku á árinu 2023 er 21 milljarður króna. Í tilkynningunni kemur fram að heildarfjármögnun ársins, fyrir þetta útboð, nemi 16,3 milljörðum króna, að meðtöldum 6 milljarða króna ádrætti á langtímalán hjá Íslandsbanka.

Skuldabréfaflokkurinn RVK 53 1 ber fasta 4,4% verðtryggða vexti og af bréfunum greiðir Reykjavíkurborg jafnar greiðslur á sex mánaða fresti með lokagjalddaga 10. desember 2053. Heildarstærð RVK 53 1 fyrir þetta útboð nemur alls 24.285 milljónum króna, segir í tilkynningunni, að nafnvirði, að meðtöldum eigin bréfum Reykjavíkurborgar en upphæð þeirra er sögð nema 1 milljarði króna.

Hinn skuldabréfaflokkurinn, RVKN 35 1, ber fasta 6,72% óverðtryggða vexti og af honum eru greiddar jafnar afborganir á sex mánaða fresti með lokagjalddaga 26. mars 2035. Heildarstærð RVKN 35 1 fyrir þetta útboð nemur alls 21.520 milljónum króna, samkvæmt tilkynningunni, að nafnvirði, að meðtöldum eigin bréfum Reykjavíkurborgar sem nema 960 milljónum króna.

Í tilkynningunni segir að útboðið verði með svokallaðri hollenskri aðferð, þar sem öll skuldabréf verða seld á hæstu ávöxtunarkröfu sem tekið verður. Einnig er tekið fram að Reykjavíkurborg áskilji sér rétt til að taka hvaða tilboði sem er að hluta eða í heild eða hafna öllum. Niðurstöður útboðsins verða birtar opinberlega eigi síðar en næsta virka dag eftir að því lýkur.

Áætlaður uppgjörsdagur er þriðjudagurinn 22. ágúst næstkomandi.