Tryggvi Rafnsson leikari var kosinn formaður Samfylkingarinnar í Hafnarfirði á aðalfundi mánudaginn 6. Mars. Hann tekur við af Jóni Grétari Þórssyni, sem tók við sem gjaldkeri landsflokks Samfylkingarinnar eftir síðasta landsþing. Tryggvi var valinn Hafnfirðingur ársins árið 2021 og vakti hann mikla athygli þegar hann lék forseta Íslands í áramótaskaupinu fyrir nokkrum árum. Tryggvi gaf út sína fyrstu ljóðabók, Ég, í fyrra, en hún fjallar á opinskáan hátt um glímu höfundarins við geðveikina. Textarnir eru bæði ljóðrænir og aðgengilegir og opna þannig leið inn í umræðu sem mörgum reynist erfið. Hlaut Tryggvi mikið lof fyrir bókina.
Nýja stjórn Samfylkingarinnar skipa, Gauti Skúlason, Helena Mjöll Jóhannsdóttir, Hildur Guðmundsdóttir, Inga Björk Margrétar Bjarnadóttir, Jón Grétar Þórsson, Kolbrún Lára Kjartansdóttir og Ófeigur Friðriksson. Auður Brynjólfsdóttir og Stefán Már Gunnlaugsson voru kjörin sem skoðunarmenn reikninga og að auki voru Sigrún Sverrisdóttir, Árni Rúnar Þorvaldsson og Valgerður María Guðmundsdóttir kosin í kjörstjórn.
Á fundinum var farið yfir skýrslu stjórnar og stiklað á því sem unnið hefur verið í félaginu frá því að fráfarandi stjórn tók við. Jafnframt fóru almenn aðalfundarsköp fram með hefðbundnum hætti. Góðar umræður áttu sér stað undir 10. dagskrárlið um önnur mál, þar sem félagar deildu hugmyndum um framtíðarsýn sína á félagið.
