Bandaríkin eiga að hætta að eyða peningum í að styðja Úkraínu í að verjast innrás Rússa. Í raun ætti hluti af Úkraínu að tilheyra Bandaríkjunum sem endurgjald fyrir þann mikla hernaðarstuðning sem núverandi ríkisstjórn hefur látið Úkraínu í té.

Þetta sagði Donald Trump, fyrrum Bandaríkjaforseti, þegar hann ávarpaði flokksráðstefnu Repúblikana, CPAC, aðfaranótt sunnudags.

Trump ætlar að reyna að verða forseti á nýjan leik þegar kosið verður 2024 og nýtti ráðstefnuna til að segja flokkssystkinum sínum hvað hann ætlar að gera ef hann verður kjörinn forseti.

„Efst á lista mínum er að stöðva þessi skref okkar í átt að dýrum stríðum sem lýkur aldrei. Við verðum að stöðva þetta. Við getum ekki eytt hundruðum milljarða dollara í að vernda fólk sem líkar ekki einu sinni við okkur,“ sagði Trump meðal annars.

Að vanda hafði hann mikla trú á eiginn hæfileikum og getu og sagðist geta bundið enda á stríðið um leið og hann verður kjörinn forseti. „Þetta verður leyst hratt. Hratt. Ég leysi vandamálið og það hratt, það mun ekki taka mig meira en einn dag,“ sagði hann.

Hann sagðist auðveldlega geta fengið Zelenskyy og Pútín til að ná saman. „Ég veit nákvæmlega hvað ég á að segja við þá báða. Ég náði vel saman við þá báða. Ég náði vel saman við Pútín,“ sagði hann.

Síðan sagði hann að það hefði verið hann sem hefði stöðvað lagningu Nord Stream 2 gasleiðslunnar og að Pútín bæri virðingu fyrir sér. „Mér kom vel saman við Pútín, jafnvel þótt það hafi verið ég sem stöðvaði gasleiðsluna hans,“ sagði Trump og gleymdi að nefna að gasleiðslan var lögð eins og til stóð og var í notkun þar til síðasta haust þegar göt voru sprengd á hana.