Samkvæmt könnun Maskínu fyrir marsmánuð hafa allir flokkarnir í ríkisstjórn tapað þónokkru fylgi og er samanlagt fylgi þeirra um 39% sem er sambærilegt því sem var í febrúar. Til samanburðar var samanlagt kjörfylgi þeirra 54,4% eftir kosningar.
Maskína mælir fylgi stjórnmálaflokka á landsvísu mánaðarlega og samkvæmt fylgismælingu í mars mælist Samfylkingin stærst allra flokka þriðja mánuðinn í röð.
Samfylkingin hefur bætt við sig töluverðu fylgi eftir að Kristrún Frostadóttir tók við formennsku síðastliðið haust og er fylgið nú 24-25%. Það er rúmum 4 prósentustigum meira en Sjálfstæðisflokkurinn sem mælist næst stærstur þriðja mánuðinn í röð. Í fyrsta skipti er munurinn á flokkunum marktækur sé tekið tillit til vikmarka en þó með minnsta mögulega mun.
Fylgi VG hrynur
Litlar breytingar eru á fylgi Framsóknar undanfarna mánuði og mælist flokkurinn með rúmlega 13%. Fylgi VG hrynur samkvæmt könnuninni og er með 6% fylgi sem er með því allra minnsta sem flokkurinn hefur nokkurn tímann verið með. VG skipar sér nú í hóp minnstu flokkanna sem eiga sæti á Alþingi.
Viðreisn mælist með 9% fylgi, Píratar með 10% fylgi. Fylgi bæði Miðflokksins og Flokks fólksins hefur verið stöðugt síðastliðna mánuði í kringum 5-6%. Fylgi Sósíalista hefur verið á bilinu 4-6%.
Könnunin var lögð fyrir Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðskrá, á netinu. Alls voru svarendur 1.599, en þeir eru alls staðar að af landinu og á aldrinum 18 ára og eldri. Gögnin eru vigtuð samkvæmt Þjóðskrá og endurspegla því þjóðina prýðilega. Könnunin fór fram dagana 6. til 20. mars 2023.