Miðstjórn Alþýðusambands Íslands (ASÍ) lýsir yfir þungum áhyggjum af þróun verðbólgunnar og telur það gagnrýnisvert að stjórnvöld hafi leitt há sér ábendingar og varnarorð um að hækkun ýmissa skatta og gjalda um áramót myndu koma „af fullum þunga niður á almenningi í formi minni kaupmáttar, verðbólgu og vaxtahækkana.“

Þetta kemur fram í tilkynningu um ályktun sem miðstjórn ASÍ hefur gefið út.

„Sú spurning gerist sífellt áleitnari hvort íslenskir ráðamenn hafi með öllu glatað sambandi við líf almennings í landinu“

Verðbólgan mælist nú 9,9 prósent og hafi aftur náð því hámarki sem mældist í júlí á síðasta ári. Stærsti hluti hækkunar í janúarmánuði megi rekja til ákvarðana ríkisstjórnar um að auka „álögur, gjöld og skatta.“

Þessar ákvarðanir geti svo kallað á stýrivaxtahækkun frá Seðlabanka Íslands og skila sér þannig af fullum þunga heim til almennings með því að auka greiðslubyrði lána.

„Miðstjórn Alþýðusambandsins lýsir furðu á þeim málflutningi stjórnvalda að hækkanir þessar séu með öllu eðlilegar. Það eru þær ekki. Þær auka allan framfærslu- og rekstrarkostnað almennings sem var óheyrilegur fyrir. Þessar aðgerðir bitna af mestum þunga á láglaunafólki og um leið og hinum fátæku er refsað er efnafólki og völdum atvinnugreinum hlíft.“

Miðstjórn ASÍ minnir launafólk á að þessar aðgerðir stjórnvalda séu mannana ver og það séu engin lögmál sem mæli fyrir um að það sé almenningur sem þurfi að bera byrðarnar þegar á móti blæs.

„Ólíkt því sem á við víðast hvar í nágrannaríkjum fer verðbólga á Íslandi enn vaxandi. Erlendis hafa ráðamenn markvisst unnið að því að kynda ekki verðbólgubálið. Þar vinna stjórnvöld að því að lina áhrif „afkomukreppunnar“ svonefndu á almenning. Slíkar aðgerðir skortir mjög á Íslandi nú um stundir.“