Klukkan 12 á hádegi næstkomandi fimmtudag hefst boðað verkbann SA á félaga innan Eflingar. Ekkert gerðist í deilu Eflingar og SA um helgina og er deilan í hnút sem sífellt herðist. Ríkissáttasemjari hefur ekki boðað til nýs fundar í deilunni  og ekkert bólar á nýrri miðlunartillögu.

Sólveig Anna Jónsdóttir, formaður Eflingar, boðar harðar aðgerðir félagsins í grein sem hún birti á Vísi og í skrifum á Facebook-síðu sinni:

„Félagið mun boða aðgerða strax klukkan 12 á hádegi næstkomandi fimmtudag, á þeirri stundu sem verkbannið hefst, og mun bjóða öllum félagsmönnum sem lenda í verkbanni að taka þátt í þeim,“ segir Sólveig Anna.

Hún segir að verkbann SA sé til þess ætlað að sýna hver fari með valdið á íslenskum vinnumarkaði, það sé ekki tilkomið vegna þess að fyrirtæki ráði ekki við hófstilltar launakröfur Eflingar:

„Með því að taka lífs­viður­værið af 20.000 fjöl­skyldum ætla Sam­tök at­vinnu­lífsins að sýna hverjir það eru sem halda um tauma ógnar­stjórnar á ís­lenskum vinnu­markaði.“

Sól­veig Anna segir mikil­vægt að fé­lags­fólk í Eflingu krefji sína at­vinnu­rek­endur um skýr svör um af­stöðu þeirra til verk­banns og hvort þeir ætli að skilja fólk eftir launalaust. Hún segir að áhrifamáttur verkbannsins sé augljós enda geti fólk sem ekki getur lifað af laununum sínum augljóslega ekki lifað án þeirra. Hún segir boðaðar aðgerðir SA vera ofbeldi og ógnarstjórn, en Efling muni aldrei gefst upp fyrir slíku:

„Efling mun aldrei gefast upp fyrir ofbeldi og ógnarstjórn. Efling fordæmir verkbann Samtaka atvinnulífsins og mun berjast gegn því af alefli. Sterkasta afl verkafólks er fjöldinn og samstaðan, og félagið mun sýna þann styrk í verki í baráttu gegn verkbanninu á næstu vikum.“

Athugið nýjar vendingar í málinu: Verkbanni frestað