Hagfræðingurinn Stefán Ólafsson, sem starfar sem sérfræðingur hjá Eflingu, segir að lítið hafi borið á milli í viðræðum Eflingar og SA þegar SA skyndilega sneri við blaðinu á laugardag. Stefán fer yfir þetta í grein á Vísi í dag:

„Einlægur samningsvilji og jákvæð leit að lausnum var leiðarljós Eflingarfólks í viðræðunum. Efling tók mörg skref til að nálgast SA. Viðræðurnar snérust um að aðlaga launatöflu Eflingar að sérstökum aðstæðum verkafólks á höfuðborgarsvæðinu og að gera það innan skekkjumarka kostnaðar SGS-samningsins.

Aðilar voru sammála um að SGS-samningurinn væri ódýrari fyrir fyrirtækin ef hann væri heimfærður óbreyttur á félagsmenn Eflingar á höfuðborgarsvæðinu. Efling ætti því inni einhverja umframhækkun svo félagsmenn Eflingar fengju álíka ábata af samningnum og verkafólk sem starfar undir SGS-samningnum, án þess þó að heildarkostnaður fyrirtækja yrði meiri. Ólík sjónarmið voru þó um aðferðir við mat á kostnaði og hversu mikið það svigrúm væri.“

Stefán segir að viðræðurnar hafi gengið vel á fimmtudag og föstudag og útlitið verið gott undir lok föstudags inn í helgina. Síðan hafi forysta SA snúið við blaðinu og hafi það komið samningafólki Eflingar á óvart hvað róðurinn þyngdist skyndilega þá.

Hann segir: „Full ástæða er því til að efast um að SA-fólk hafi haft alvöru samningsvilja að þessu sinni. En Efling sýndi mikinn samningsvilja í verki – á marga vegu.“

Þáttur Halldórs Benjamíns vekur athygli

Halldór Benjamín Þorgeirsson, framkvæmdastjóri SA, hvarf frá viðræðunum vegna veikinda í liðinni viku en kom að þeim aftur endurnærður um helgina. Hefur því verið gert skóna í umræðum á samfélagsmiðlum að nærvera hans við samningaborðið hefði verið orsökin fyrir viðsnúningnum. DV hefur ekki tekist að ná tali af Halldór í dag en hann sagði í viðtali við Vísi í morgun:

„Ég gef ekkert fyrir söguskýringar riddara Facebook. Öfugt við Eflingu eru Samtök atvinnulífsins dreifstýrð samtök, það er enginn einn sem stýrir stefnu SA eða hvernig við högum okkur.“

Vildi Halldór meina að samningsvilji Sólveigar Önnu væri eitthvað sem hún héldi á lofti í fjölmiðlum en birtist ekki við samningaborðið.