Vilhjálmur Birgisson, formaður Starfsgreinasambandsins, vekur athygli á „græðgisvæðingu sem hefur heltakið bankakerfið“ í færslu sem hann ritaði á Facebook í dag í tilefni af morgunverðarfundi um nýútkomna skýrslu um gjaldtöku og arðsemi bankanna. Fundurinn fór fram í morgun á vegum ASÍ, BSRB, BHM og Neytendasamtakanna.

Segir Vilhjálmur að þar hafi margt endurspeglað þessa „græðgisvæðingu“ en það sem helst vakti athygli Vilhjálms var erindi eins af stofnendum bankans INDÓ, Hauks Skúlasonar.

„Í hans erindi kom meðal annars fram „svokallað“ bullálag sem bankarnir leggja á sína „viðskiptavini“.“

Þetta sé gjaldeyrisálag sem sé lagt á neytendur á Íslandi og kosti þá 7,2 milljarða á ári. Árgjald korta sem nemi 1,3 milljarði, færslugjöld sem nemi einum milljarði og svo seðilgjöld uppá 500 milljónir.

„Samtals gera þessi bullgjöld 10 milljarða á hverju ári en af hverju kallar Haukur Skúlason þetta bullgjöld jú, vegna þess að INDÓ rukkar ekki þessi gjöld af sínum viðskiptavinum og af hverju rukkar INDÓ ekki þessi gjöld? Jú, það er vegna þess að hjá INDÓ er enginn kostnaður sem þeir þurfa að greiða vegna þessara þátta.“

Vilhjálmur rekur að það sama hljóti að vera satt fyrir viðskiptabankana þrjá, Landsbankann, Arion og Íslandsbanka. Því séu bankarnir að hafa 10 milljarða af neytendum á ári, án þess að bera af því nokkurn kostnað. Þetta jafngildi því að meðal bullgjöld á þriggja manna fjölskyldu sé rúmlega 71 þúsund krónur á ári.

„Þetta er galið og ég spyr hvernig má það gerast að bankarnir geti lagt bullgjöld á „viðskiptavini“ sína án þess að neinn kostnaður sé til staðar hjá bönkunum. Hvar eru stjórnvöld, Alþingi og Fjármálaeftirlitið er hægt að láta svona rán eiga sér stað ár eftir ár. INDÓ hefur sýnt að það er enginn kostnaður sem fellur á þá vegna þessara bullgjalda og það sama hlýtur að gilda fyrir viðskiptabankana.“

Þetta sé næstum sama upphæð og auðlindagjöld í sjávarútvegi fyrir árið 2022. Á þeim tíma hafi þingmenn látið heyra í sér og slegið skjaldborg um sjávarúteginn, en þeim sé að því er virðist sléttsama um bullgjöld bankanna.

Vilhjálmur rekur að bankastjórum stóru bankanna hafi verið boðið á fundinn í morgun en ekki séð sér fært að mæta.

„Er ekki hissa því það er útilokað fyrir bankastjóranna að útskýra og réttlæta þá græðgisvæðingu sem hefur enn og aftur heltekið bankanna.“