Jón Gunnarsson dómsmálaráðherra á að stíga upp úr stóli sínum í mars og Guðrún Hafsteinsdóttir að taka við embætti hans. En Jón vill ekki hætta og telur óráð að honum verði skipt út. Jón er mjög afdráttarlaus um þetta í viðtali við Fréttablaðið í dag. Hann segist raunar ekki hafa fengið nein skilaboð um að hætta störfum:
„Það liggur fyrir að formaður flokksins hefur boðað breytingar á ríkisstjórninni. Hvenær það verður nákvæmlega og hvernig get ég ekki sagt um. Ég hef ekki fengið nein skilaboð um það að pakka saman, hvorki frá flokksformanninum né þingflokknum,“ segir Jón í viðtalinu og sýnir engin fararsnið á á sér.
„Það er óheppilegt að skipta um hest í miðri á,“ segir Jón jafnframt ákveðinn. Hann sé í miðjum klíðum í veigamiklum verkefnum. Hann segir stöðugleika skorta í dómsmálaráðuneytið og þykir afleitt að hann sé látinn víkja á þeim tímapunkti þegar hann er rétt búinn að koma sér inn í flókin mál. Hann segir:
„Ég og aðstoðarmenn mínir gerðum okkur strax grein fyrir því að við hefðum mögulega takmarkaðan tíma til breytinga. Við þyrftum að hafa hraðar hendur, enda vildum við koma miklu í verk. Það var kominn tími á nauðsynlegar breytingar. Og sumt af því stóð einfaldlega í stjórnarsáttmálanum, svo sem að efla löggæslu og gera átak í kynferðisbrotamálum.“