Léttkort Símans Pay, ný kynslóð kreditkorta gerir viðskiptavinum sínum nú kleift að kaupa sveigjanlegar ferðatryggingar frá VÍS með kortinu. Hægt er að segja ferðatryggingunni upp hvenær sem er en einungis er greitt fyrir mánuð í senn og þannig hægt að spara sér kostnað við ferðatryggingar nema í þau skipti sem að korthafi fer erlendis.

Í fréttatilkynningu frá fyrirtækunum kemur fram að Léttkortið sé stafrænt kreditkort sem styður bæði Apple Pay og Google Wallet, og er gefið út í samstarfi við Mastercard. Ekkert gjaldeyrisálag er á Léttkortinu né árgjald sem gerir Léttkortið að frábærum valmöguleika fyrir íslenska neytendur í ferðum erlendis sem og í öllum erlendum netverslunum.

„Við höldum ótrauð áfram að þróa það sem við teljum sveigjanlegasta kreditkortið á markaðanum þar sem viðskiptavinir okkar einfaldlega velja sér þá þjónustu sem þau telja sig þurfa í það og það skiptið. Með valkvæðri ferðatryggingu frá VÍS, engu gjaldeyrisálagi né árgjaldi ásamt Vildarpunktasöfnun Icelandair teljum við Léttkortið besta ferðafélaga Íslendinga erlendis,“ er haft eftir Gunnari Hafsteinssyni, framkvæmdastjóra Símans Pay.

Guðmundur Ólafsson, forstöðumaður fyrirtækjaviðskipta hjá VÍS, segist vera spenntur fyrir samstarfinu við Símann Pay: „Við hjá VÍS fögnum því að geta nú boðið víðtækar ferðatryggingar fyrir Léttkortið“.