Talsmenn atvinnurekenda á vinnumarkaði og formenn helstu verkalýðsfélaga hækka nokkuð hóflega í launum milli ára. Eins og fyrri ár er það talsvert betra fyrir budduna að gæta hagsmuna atvinnurekenda heldur en launamanna. Athygli vekur að Ragnar Þór Ingólfsson og Halldór Benjamín Þorbergsson lækka verulega í launum milli ára.
Launahæstur þeirra sem úttekt DV nær til er Sigurður Hannesson, framkvæmdastjóri Samtaka iðnaðarins, með mánaðarlaun upp á 3.918.631 á síðasta ári og hækkar í launum um tæplega 6,5% milli ára.
Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, er skammt undan en hún var með 3.858.600 í mánaðarlaun á síðasta ári og hækkar um 3,6% frá fyrra ári. Rétt er að geta þess að árið á undan höfðu laun Heiðrúnar Lindar lækkað.
Sjá einnig: Tekjudagar 2022 – Meira upp úr því að hafa að gæta hagsmuna stórfyrirtækja en launþega
Ólíkt kollegum sínum lækkaði Halldór Benjamín Þorbergsson, fyrrum framkvæmdastjóri Samtaka atvinnulífsins, í launum milli ára. Hann fékk 3.341.798 í mánaðarlaun á síðasta ári fyrir sín störf en var með rúmlega 3,7 milljónir árið áður. Það þýðir launalækkun upp á 9% milli ára en um var að ræða annað árið í röð sem laun hans lækkuðu.
Hagur Halldór Benjamíns vænkast þó vonandi á þessu ári enda tók hann nýlega við forstjórastarfi fasteignafélagsins Regins.
Ragnar Þór Ingólfsson er launahæstur þeirra verkalýðsleiðtoga sem úttekt DV nær til. Ragnar Þór fékk 1.498.750 í mánaðarlaun á síðasta ári en hann lækkaði verulega í launum milli ára eða um 14,7%.
Vilhjálmur Birgisson, formaður Starfsgreinasambands Íslands, var með 1.483.140 á mánuði fyrir sín störf á síðasta ári og hækkar um rúm 11% milli ára. Hann tók enda við nýju starfi formanns Starfsgreinasambands Íslands um mitt síðasta ár.
Sólveig Anna Jónsdóttir, formaður Eflingar, var með 1.078.651 í mánaðarlaun á síðasta ári og hækkaði í launum um 3,7%.
