Fjórir flokkar úr stjórnarandstöðunni á Alþingi lögðu í gær fram vantrauststillögu gegn Jóni Gunnarssyni dómsmálaráðherra. Umræður um tillöguna hófust á þingi klukkan 10:30 og hefur tillagan nú gengið í atkvæði og var felld. Greiddu 35 þingmenn tillögu gegn henni og 22 með.
Mátti rekja tillöguna til gagnrýni á Jón fyrir að hafa komið í veg fyrir að Alþingi fengi í hendurnar gögn sem varða afgreiðslu Alþingis á umsóknum um ríkisborgararétt. En að meginstefnunni til fer Alþingi með valdheimild til að veita ríkisborgararétt.
Í vikunni hefur mikið verið rætt um minnisblað frá skrifstofu Alþingis sem fjallaði um að samkvæmt þingskapalögum væri það ótvíræð skylda að afhenda Alþingi þau gögn sem beðið er um. Þótti stjórnarandstöðunni því ljóst að Jón hefði brotið lög með því að koma í veg fyrir að Alþingi fengi áðurnefnd gögn.
Það var svo í kjölfar þess að minnisblaðið var lagt fram sem stjórnarandstaðan lagði fram vantrauststillögu sína.