Elva Hrönn Hjartardóttir, mótframbjóðandi Ragnars Þórs Ingólfssonar í formannsembætti VR segir að lesskilningi formannsins sé ábótavant og að hann leggi sig fram við að snúa út úr öllu sem hún segir.
Fyrr í dag brást Ragnar Þór illa við viðtali sem birtist við Elvu Hrönn í Dagmálaþætti Morgunblaðsins og sakaði hana um að ljúga því að starf hennar væri í hættu ef hún tapaði kosningunum. Elva Hrönn segir að Ragnar Þór hafi greinilega mistúlkað orð hennar því að hún hafi sagt að það hafi verið sameiginleg niðurstaða úr samtali við hennar við næstu yfirmenn innan VR, sem Ragnar Þór er ekki, að henni væri ekki stætt í starfi áfram nái hún ekki kjöri. Það hafi hún þó ekki minnst á að fyrra bragði í því samtali.
Þá segir hún að bak við tjöldin hafi Ragnar Þór verið afar ósáttur við mótframboð hennar.
„Viðbrögð núverandi formanns þegar ég sagði honum frá ætlun minni um framboð staðfestu hinsvegar þá niðurstöðu sem ég og stjórnendur í VR komumst að. Og ég segi það hér og nú að núverandi formaður var langt frá því að vera ánægður með þá ákvörðun mína að ætla að bjóða mig fram til formanns. Aðeins svo langt nær lýðræðið sem hann talar svo mikið um að hann fagni og styðji við.“
