Morgunblaðið vill forystu Eflingar burt ef marka má skoðanadálkinn Staksteina í morgun. Hörð verkfallsvarsla Eflingar undanfarið hefur vakið mikla athygli og verið umdeild. Í vikunni kom Sólveig Anna kröftugum skilaboðum á framfæri við gesti Íslandshótela og sagði verkfallsbrot vera framin þar. Verkfallsverðir höfðu sig síðan í frammi gagnvart ráðherrum ríkisstjórnarinnar er þeir komu af ríkisstjórnarfundi í Ráðherrabústaðnum í gær, föstudag. Hefur þessi framganga vakið ýmist aðdáun eða reiði.

Athygli vakti að ASÍ ályktaði, að virtist gegn aðgerðunum, og varaði við fúkyrðum og hatri. Sólveig Anna svaraði þeirri ályktun kröftuglega í gær. En Staksteinar segja:

„Það þarf töluvert til að Alþýðusambandið setji ofan í við þá sem heyja kjarabaráttu en það var full ástæða til í gær. Í ályktun hvetur ASÍ til stillingar og varar við því að kjaradeilur séu túlkaðar á þann veg „að réttmætt sé að ausa fúkyrðum og hatri yfir þau sem að þessum verkefnum koma“. Þá segir í ályktuninni að ótækt sé „að ágreiningur sé nýttur til að hafa í frammi haturskennd og viðurstyggileg ummæli í garð tiltekinna einstaklinga, hópa og samtaka.““

Dálkahöfundurinn segir að öllum blöskri framganga forystu Eflingar og að félagsmenn Eflingar verði að grípa í taumana og losa sig við forystuna:

„Forysta Eflingar, með stuðningi örfárra félagsmanna, hefur gengið fram af slíku offorsi að öllum ofbýður. Almennt orðbragð er óboðlegt, árásirnar á ríkissáttasemjara og viðmælendur sömuleiðis, en eftir að verkfall hófst hefur framkoman versnað enn. Formaður Eflingar fór inn á hótel og áreitti þar gesti og var með óviðeigandi athugasemdir við starfsmenn. Þetta er auðvitað fyrir neðan allar hellur. Höfuðið var svo bitið af skömminni með því að gera aðsúg að ráðherrum ríkisstjórnarinnar og hafa í frammi ógnandi hegðun sem aldrei á að líðast. Almennir félagsmenn Eflingar verða að taka í taumana og losa sig við forystu sem með framgöngu sinni hefur skaðað þá stórkostlega, ekki aðeins fjárhagslega heldur einnig orðsporið.“