Sólveig Anna Jónsdóttir segir ekkert hæft í þeim meiningum Davíðs Torfa Ólafssonar, framkvæmdastjóra Eflingar, um að logið hafi verið að félagsmönnum Eflingar hjá Íslandshótelum þegar verkfallsaðgerðir voru kynntar þeim.

Frá þessu greinir Sólveig í yfirlýsingu á Facebook, en Davíð Torfi hefur í dag haldið því fram að starfsmenn Íslandshótela hafi ekki verið upplýstir með fullnægjandi hætti um hvað fælist í verkfallsaðgerðum og mögulegu tekjutapi sem það gæti valdið. Eins hafi starfsmenn ekki verið upplýstir um að aðeins þeir væru á leið í verkfall.

Sólveig Anna segir þetta af og frá.

„Ef þetta væri ekki svona fáránlegt væri þetta auðvitað hlægilegt. En ég skal svara þessari spurningu hér og svo hvar sem er: Nei, hvorki ég né félagar mínir í samninganefnd Eflingar sem heimsóttu Íslandshótel á síðastliðnum dögum lugum að félagsfólki.“

Sólveig segir að samninganefnd Eflingar hafi ekkert að fela og þurfi ekki að notast við lygar eða blekkingar.

Efling hafi síðdegis í dag sent félagsfólki á Íslandshótelum tölvupóst þar sem fullyrðingar Davíðs Torfa hafi verið hraktar. Til að mynda fullyrðing um að afturvirkni kjarasamninga glatist með verkfallsaðgerðum. Efling muni enn sem áður krefjast afturvirkni. Eins kemur þar fram að frekari verkfallsaðgerðir séu í burðarliðum og verði kosið um þær fljótlega.