Óttar Guðmundsson geðlæknir gerir athugasemd við það að ráðherrar hafi mætt í opnunarpartí sjóbaðanna í Hvammsvík, sem eru í eigu Skúla Mogensen, fyrrverandi forstjóra WOW air. Óttar ræðir þetta í bakþönkum sínum í Fréttablaðinu.

„Skúli setti flug­fé­lagið WOW glæsi­lega á hausinn í árs­byrjun 2019. Fé­lagið var um­vafið skuldum eins og skrattinn skömmunum. At­vinnu­lífið á Suður­nesjum var slegið í rot og ríkis­sjóður tapaði milljörðum. Or­sakir gjald­þrotsins má rekja til ýmiss konar mis­taka í stjórn og rekstri þessa lág­gjalda­flug­fé­lags. Þar var aðal­lega við Skúla að sakast sem hagaði sér alltaf eins og sjálf­miðað barn í hlut­verka­leik,“ segir Óttar og vandar athafnamanninum ekki kveðjurnar.

Óttar segir að fjölmiðlamenn hafi brugðist hart við er fréttist að Bjarni Benediktsson fjármálaráðherra hefði mætt í samkvæmi í Ásmundarsal á Þorláksmessu árið 2020 sem var á gráu svæði hvað varðaði þágildandi sóttvarnareglur í Covid-faraldrinum. Enginn fjölmiðill geri hins vegar athugasemd við þetta partí. Óttar spyr hvort það sé hlutverk ráðherra að hjálpa gjaldþrota auðmanni að auglýsa nýtt fyrirtæki sitt:

„Þessi saga þvældist þó ekkert fyrir Sjálf­stæðis­ráð­herrunum sem þar flat­möguðu í heitu sjávar­keri á­samt þotu­liðinu og drukku eðal­vín. Enginn blaða­maður spurði af hverju á­byrgðar­menn ríkis­sjóðs tækju þátt í slíkum fögnuði. Hvað varð um hug­tök eins og „pólitísk á­byrgð“, „sam­staða með kjós­endum“ og „arms­lengd frá at­vinnu­lífinu“? Er það virki­lega hlut­verk ráð­herra að hjálpa gjald­þrota auð­manni að aug­lýsa nýtt fyrir­tæki í ferða­manna­bransanum? Við skulum vona að böðin fari ekki sömu leið og vá-flugið sem brot­lenti þrátt fyrir lita­gleði, snobb og flott­heit. En þá verða Sjálf­stæðis­ráð­herrarnir væntan­lega komnir í annað bað.“